ಏನಿದು 4X4?

  By

– ಜಯತೀರ್ಥ ನಾಡಗೌಡ. 

ಸಾಮಾನ್ಯವಾಗಿ ಎಸ್‌ಯುವಿ, ಪಿಕ್‌ಅಪ್ ಟ್ರಕ್ ಇಲ್ಲವೇ ಸಿರಿತನದ ಕಾರುಗಳಲ್ಲಿ 4X4 ಬರೆದಿರುವುದನ್ನು ನೋಡಿರುತ್ತೀರಿ. ಹೀಗೆಂದರೇನು? ಯಾವ ಕಾರಣಕ್ಕೆ ಗಾಡಿಗಳ ಮೇಲೆ ಹೀಗೆ ಬರೆಯುತ್ತಾರೆಂದು ಹಲವರಿಗೆ ಕುತೂಹಲ ಮೂಡುವುದು ಸಹಜ. ಒಮ್ಮೆ ಈ ರೀತಿ 4×4 ಮಂದೆ ಯಾರೋ ಇದರ ಉತ್ತರ 16 ಎಂದು ಬರೆದು ತಮಾಷೆ ಮಾಡಿದ್ದುಂಟು. 4×4 ಎಂದರೇನು? ಇದು ಗಾಡಿಗಳ ವಿಶೇಷತೆಯೇ? ಯಾಕೆ ಹೀಗೆ ಗುರುತಿಸುತ್ತಾರೆ? ಈ ಎಲ್ಲ ಪ್ರಶ್ನೆಗಳಿಗೆ ಉತ್ತರ ತಿಳಿಯಲು ಮುಂದೆ ಓದಿ.

4×4 ಎಂದರೆ, ಗಾಡಿಯ ಎಲ್ಲ ನಾಲ್ಕು ಗಾಲಿಗಳಿಗೆ ಒಂದೇ ಸಮಯದಲ್ಲಿ ಕಸುವನ್ನು ಗಾಡಿ ಕಳಿಸುವುದು. ಎಲ್ಲ ಬಂಡಿಗಳು ಡ್ರೈವ್‌ಟ್ರೈನ್ ಹೊಂದಿರುತ್ತವೆ, ಒಂದು 4×2 ಇಲ್ಲವೇ 4X4 ಡ್ರೈವ್‌ಟ್ರೈನ್. ಡ್ರೈವ್‌ಟ್ರೈನ್ ಇದು ಗಾಡಿಯ ಬಿಣಿಗೆ(Engine) ಕಸುವನ್ನು ಗಾಲಿಗಳಿಗೆ ಸಾಗಿಸುವ ಏರ್ಪಾಟು. ಬಿಣಿಗೆಯಲ್ಲಿ ಉರುವಲು ಉರಿದು ನೀಡುವ ಕಸುವು, ಸಾಗಣಿಯ ಮೂಲಕ ಆಯಾ ಗಾಲಿಗಳಿಗೆ ಸಾಗಿದಾಗ ಅವುಗಳು ಗಾಡಿಯನ್ನು ಮುಂದಕ್ಕೆಳೆಯುತ್ತವೆ. 4×4 ಡ್ರೈವ್‌ಟ್ರೈನ್  ಇರುವ ಗಾಡಿಗಳಲ್ಲಿ, ಇಂಜೀನ್ ಎಲ್ಲ ಗಾಲಿಗಳಿಗೆ ಒಟ್ಟಿಗೆ ಕಸುವನ್ನು ನೀಡಿ ಸೆಳೆಬಲದ(Torque) ಮೂಲಕ ಗಾಡಿ ಸುಲಭವಾಗಿ ಮುಂದೆ ಸಾಗಬಹುದು. ಎಲ್ಲ ಗಾಲಿಗಳಿಗೆ ಒಟ್ಟಿಗೆ ಸೆಳೆಬಲ ಸಿಗುವುದರಿಂದ ಗಾಡಿಯೂ ಗುಡ್ಡಗಾಡುಗಳ ರಸ್ತೆಗಳಲ್ಲಿ, ತಗ್ಗುದಿನ್ನೆಯಿಂದಾದ ದಾರಿಗಳಲ್ಲಿ, ಕೆಸರು, ಮಂಜುಗಡ್ಡೆ ಬಿದ್ದಿರುವ ಬೀದಿಗಳಲ್ಲೂ ಸುಲಭವಾಗಿ ಮುನ್ನುಗ್ಗುತ್ತದೆ. ಹೆಚ್ಚಿನ ಕಸುವು ಮತ್ತು ಸೆಳೆಬಲ ನೀಡುವ ಇಂತಹ ಡ್ರೈವ್‍ಟ್ರೈನ್ ಗಾಡಿಗಳು ವಿವಿಧ ರೇಸ್, ಸಾಹಸ ಮನೋರಂಜನೆಗಾಗಿ ಅಚ್ಚುಮೆಚ್ಚು. ಇದೇ ಕಾರಣಕ್ಕೆ ಇವುಗಳನ್ನು ಕಣಿವೆ, ಪರ್ವತ ಗುಡ್ಡಗಾಡು ಪ್ರದೇಶಗಳಲ್ಲಿ ಹೆಚ್ಚಾಗಿ ಕಾಣಬಹುದು. ಮುಳ್ಳಯ್ಯನಗಿರಿಯ ಬೆಟ್ಟದ ಸಾಲಿನಲ್ಲಿ, ಕೊಡಗಿನ ಕಿರಿದಾದ ಕಾಡಿನ ರಸ್ತೆಗಳಲ್ಲಿ, ಲಡಾಖಿನ ಮಂಜಿನ ಗುಡ್ಡಗಳಲ್ಲಿ ಇಂತಹ 4×4 ಎಸ್‌ಯುವಿಗಳಿದ್ದರೆ ಜುಮ್ಮನೆ ಓಡಾಡಿಕೊಂಡಿರಬಹುದು. ಎಲ್ಲ ಗಾಡಿಗಳು 4×4  ಆಗಿರುತ್ತವೆಯೇ ಎಂಬ ಪ್ರಶ್ನೆಗೆ ಇಲ್ಲ ಎನ್ನುವ ಉತ್ತರ. ದೈನಂದಿನ ಬಳಕೆಗೆ ಪಟ್ಟಣ, ನಗರ ಪ್ರದೇಶಗಳಲ್ಲಿ ಓಡಾಡಲು, ಹೆದ್ದಾರಿಗಳಲ್ಲಿ ಸಾಗಲು 4×4 ಬೇಕಾಗಿಲ್ಲ. ಇಂತಹ ಬಳಕೆಗ 4×2 ಡ್ರೈವ್‍ಟ್ರೈನ್ ಹೊಂದಿರುವ ಗಾಡಿಗಳು ತಕ್ಕುದಾಗಿವೆ.

4×2 ಗಾಡಿಗಳಲ್ಲಿ ಮೊದಲು ಕಸುವು ಮುಂದಿನ ಇಲ್ಲವೇ ಹಿಂದಿನ ಎರಡು ಗಾಲಿಗಳಿಗೆ ಮೊದಲು ತಲುಪಿ, ನಂತರ ಅವುಗಳು ಇತರೆ 2 ಗಾಲಿಗಳನ್ನು ಎಳೆದು ಗಾಡಿ ಸಾಗುವಂತೆ ನೋಡಿಕೊಳ್ಳುತ್ತವೆ. ಮೊದಲು ಕಸುವನ್ನು ತಲುಪುವ ಎರಡು ಗಾಲಿಗಳು ಹಿಂಬದಿಯವು ಇಲ್ಲವೇ ಮುಂಬದಿಯವು ಆಗಿರಬಹುದು. ಇದೇ ಕಾರಣಕ್ಕೆ ಇವುಗಳನ್ನು ಫ್ರಂಟ್ ವೀಲ್ ಡ್ರೈವ್ ಮತ್ತು ರೇರ್ ವೀಲ್ ಡ್ರೈವ್ ಎಂಬ ಎರಡು ಬಗೆಗಳಲ್ಲಿ ನೋಡಬಹುದು. 4×2 ಗಳ ರೇರ್ ವೀಲ್ ಡ್ರೈವ್ ಇದ್ದರೆ, ಮೊದಲು ಕಸುವು ಪಡೆಯುವ ಹಿಂಬದಿಯ ಗಾಲಿಗಳು ಗಾಡಿಯನ್ನು ಬ್ಯಾಲನ್ಸ್ ಮಾಡಲು/ ತೂಕವನ್ನು ಸರಿದೂಗಿಸಲು  ನೆರವಾದರೆ, ಮುಂದಿನ ಗಾಲಿಗಳು ಗಾಡಿಯನ್ನು ಬೇಗನೆ ತಿರುಗಿಸಲು(Steering) ನೆರವಾಗುತ್ತವೆ. ಇದೇ ಕಾರಣಕ್ಕೆ ಕೆಲವು ಆಟೋಟದ ಗಾಡಿಗಳು, ಪಿಕ್-ಅಪ್ ಟ್ರಕ್, ರೇಸ್ ಗಾಡಿಗಳಲ್ಲಿ ರೇರ್ ವೀಲ್ ಡ್ರೈವ್ ಬಳಸುತ್ತಾರೆ. ಹಿಂಬದಿಯ ಗಾಲಿಗಳಿಗೆ ಕಸುವು ಸಾಗಿಸಲು ಹಿಂಬದಿ ತಿರುಗೋಲಿಗೆ(Axle) ಡಿಫರನ್ಶಿಯಲ್(Differential) ಕೇಸ್ ಎಂಬ ಭಾಗವನ್ನು ಅಳವಡಿಸಿರುತ್ತಾರೆ. ರೇರ್ ವೀಲ್ ಡ್ರೈವ್ ಗಾಡಿಗಳು ಜಾರುವ, ಮಂಜಿನಿಂದ ಕೂಡಿದ ರಸ್ತೆಗಳಲ್ಲಿ ಹಿಂಬದಿಯ ಗಾಲಿಗಳು ಎಳೆಯುವಿಕೆಯನ್ನು ಕಳೆದುಕೊಂಡು ಪರದಾಡುವುದುಂಟು. ಫ್ರಂಟ್ ವೀಲ್ ಡ್ರೈವ್ ಗಾಡಿಗಳಲ್ಲಿ ಇಂಜೀನ್-ಸಾಗಣಿ ಜೊತೆಗೆ ಮುಂಭಾಗದಲ್ಲೇ ಡಿಫರನ್ಶಿಯಲ್ ಕೇಸ್ ಅಳವಡಿಸಿರುತ್ತಾರೆ ಇದಕ್ಕೆ ಟ್ರಾನ್ಸ್ಆಕ್ಸಲ್ ಎಂದು ಕರೆಯುತ್ತಾರೆ. ಆಟೋಟದ ಗಾಡಿಗಳಂತೆ ಸರ್ರನೆ ತಿರುಗಿಸಿ ತಗ್ಗುದಿಣ್ಣೆ,  ಗುಡ್ಡಗಾಡಿನಲ್ಲಿ ಫ್ರಂಟ್ ವೀಲ್ ಡ್ರೈವ್ ಕಾರುಗಳು ಮಾಡಲಾರವು. ಪಟ್ಟಣ, ನಗರ, ದಿನದ ಓಡಾಟ ಮತ್ತು ಹೆದ್ದಾರಿಗಳಲ್ಲಿ ಸಾಗಲು ಇವುಗಳು ಸೂಕ್ತ.

ಆಲ್ ವೀಲ್ ಡ್ರೈವ್ ಗಾಡಿಗಳು ಗಾಡಿ ಒಲವಿಗರಲ್ಲಿ ಇದೀಗ ಹೆಚ್ಚು ಹೆಸರು ಮಾಡಿವೆ. ಇವುಗಳು ಒಂದು ರೀತಿಯಲ್ಲಿ 4X4 ಮತ್ತು 4X2 ಇವುಗಳ ಅನುಕೂಲಗಳನ್ನು ಒಟ್ಟಾಗಿ ನೀಡಿ ಎಲ್ಲ ವಿಧದ ರಸ್ತೆಗೆ ತಕ್ಕಂತೆ ಸಾಗಬಲ್ಲವು. ಇದರಲ್ಲಿ ಡಿಫರನ್ಶಿಯಲ್ ಕೇಸ್ ಬದಲು ಸೆಂಟರ್ ಡಿಫರನ್ಶಿಯಲ್ ಇರುತ್ತದೆ. ಈ ಬಂಡಿಗಳಲ್ಲಿ ಎಲ್ಲ ಗಾಲಿಗೆ ವೇಗ ತಿಳಿಯುವ ಅರಿವಿಕ(Sensor) ಅಳವಡಿಸಿರುತ್ತಾರೆ, ಒಂದು ವೇಳೆ ಮುಂಬದಿಯ ಗಾಲಿಯೊಂದು ಕೆಸರಲ್ಲಿ ಸಿಲುಕಿ ಮುನ್ನುಗ್ಗಲು ಪರದಾಡುವಾಗ, ಅರಿವಿಕವು ಆ ಗಾಲಿಯ ವೇಗವನ್ನು ಅರಿತು ಆಲ್ ವೀಲ್ ಡ್ರೈವ್ ಏರ್ಪಾಟಿನ ಗಣಕಕ್ಕೆ(ECU) ಮಾಹಿತಿ ನೀಡುತ್ತದೆ. ಆಗ ಸೆಂಟರ್ ಡಿಫರನ್ಶಿಯಲ್ ಮೂಲಕ ಬಿಣಿಗೆಯು ಕಸುವನ್ನು ಹಿಂಬದಿ ಗಾಲಿಗೆ ನೀಡಿ ಗಾಡಿಯನ್ನು ಮುಂದಕ್ಕೆಳೆದುಕೊಂಡು ಹೋಗುತ್ತವೆ.

ಎಲ್ಲ ನಾಲ್ಕು ಬಗೆಯ ಡ್ರೈವ್‌ಟ್ರೈನ್‌ಗಳ ವ್ಯತ್ಯಾಸ, ಅನುಕೂಲ, ಅನಾನುಕೂಲಗಳ ಬಗ್ಗೆ ಈ ಕೆಳಗಿನ ಪಟ್ಟಿಯಲ್ಲಿ ವಿವರಿಸಲಾಗಿದೆ.

 

 

ತಿಟ್ಟ ಸೆಲೆ: pirelli.com

ಈ ಅರಿಮೆಗೆ ಅಣಕವೇ ಅಡಿಪಾಯ

  By , , , , , , , , , ,

– ಪ್ರಶಾಂತ ಸೊರಟೂರ.

 

honey_tire_1

ಹಕ್ಕಿ ಹಾಯಾಗಿ ಹಾರುವುದರ, ಮೀನು ಸುಳುವಾಗಿ ಈಜುವುದರ, ಮಳೆ ಗಾಳಿಗೆ ಜಗ್ಗದೇ ನೂರಾರು ವರುಶ ಬಾಳುವ ಮರಗಳ ಹಿಂದಿನ ಗುಟ್ಟೇನು? ಒಂಟಿಯು ನೀರು ಕುಡಿಯದೇ ಹಲವು ತಿಂಗಳು ಹೇಗೆ ಬದುಕಬಲ್ಲದು? ಕಡಲ ಒಡಲಾಳದಲ್ಲಿರುವ ಜೀವಿಗಳಿಂದ ನಾವೇನು ಕಲಿಯಬಹುದು? ಹೀಗೆ ನಮ್ಮ ಸುತ್ತಣ ಜಗತ್ತು ಅಡಗಿಸಿಕೊಂಡಿರುವ ಬೆರಗುಗೊಳಿಸುವ ಒಗಟುಗಳನ್ನು ಬಿಡಿಸಿ, ಅವುಗಳನ್ನು ಚಳಕವಾಗಿ (technology) ಬಳಸುವ ಅರಿಮೆಯ ಕವಲು ಇತ್ತೀಚಿನ ವರುಶಗಳಲ್ಲಿ ತುಂಬಾ ಮಹತ್ವ ಪಡೆಯುತ್ತಿದೆ. ಇಂಗ್ಲೀಶಿನಲ್ಲಿ ಈ ಅರಿಮೆಯ ಕವಲನ್ನು ಬಯೋಮಿಮಿಟಿಕ್ಸ್ (biomimetics) ಎಂದು ಕರೆಯುತ್ತಾರೆ.

ನಮ್ಮ ಸುತ್ತಣದ (environment) ವಿಷಯಗಳಿಂದ  ಹೊಮ್ಮುವ ಈ ಅರಿಮೆಯನ್ನು ಕನ್ನಡದಲ್ಲಿ ಉಸಿರಿಯಣಕ, ಅಣಕರಿಮೆ, ಸುತ್ತಣಸೆಲೆ ಎಂದು ಕರೆಯಬಹುದು. ಈ ಅರಿಮೆ ಹೊಮ್ಮಿಸಿದ ಕೆಲವು ಚಳಕಗಳನ್ನು ಈ ಬರಹದಲ್ಲಿ ನೋಡೋಣ.

ಜೇನುಗೂಡು ಹೊಸ ಗಾಲಿಗೆ ಮಾದರಿ

ಗಾಳಿ ತುಂಬದೇ ಓಡಿಸಬಹುದಾದ ಗಾಲಿಯನ್ನು ಕಂಡುಹಿಡಿಯುವಲ್ಲಿ ಜೇನುಗೂಡಿನ ಕಟ್ಟಣೆ ನೆರವಾಗಿದೆ. ಜೇನುಗೂಡಿನ ಆರುಬದಿ ತುಣುಕುಗಳ ಆಕಾರದಲ್ಲಿ ಗಾಲಿ ಮಾಡಿದರೆ ಅದಕ್ಕೆ ಹೆಚ್ಚಿನ ತೂಕವನ್ನು ತಾಳಿಕೊಳ್ಳುವ ಮತ್ತು ತೂಕವನ್ನು ಸಮಾನಾಗಿ ಹಂಚುವ ಗುಣ ಪಡೆಯುವುದೆಂದು ಅರಕೆಯಿಂದ ತಿಳಿದು ಬಂದಿದೆ. ರೆಸಿಲಿಯಂಟ್ ಟೆಕ್ನಾಲಜಿ ಎಂಬ ಕೂಟ ಇದನ್ನು ಗುರುತಿಸಿದ್ದು, ಕಾವಲು ಪಡೆಯ ಗಾಡಿಗಳಲ್ಲಿ ಈಗ ಈ ಚಳಕವನ್ನು ಅಳವಡಿಸಲಾಗಿದೆ.

ಚಿಟ್ಟೆಯ ರೆಕ್ಕೆ ಹೊಸ ನೇಸರಪಟ್ಟಿಗಳಿಗೆ ಅಡಿಪಾಯ

ಚಿಟ್ಟಿಯ ರೆಕ್ಕೆಗಳಲ್ಲಿ ಹುದುಗಿರುವ ಅರಿಮೆ ಬಳಸಿಕೊಂಡು ನೇಸರಪಟ್ಟಿಗಳನ್ನು (solar panel) ಇನ್ನಷ್ಟು ಹದಗೊಳಿಸಲಾಗಿದೆ. ನೇಸರನ ಬೆಳಕನ್ನು ಕಸುವಾಗಿಸುವ ನೇಸರಪಟ್ಟಿಗಳನ್ನು, ಚಿಟ್ಟೆಯ ರೆಕ್ಕೆಯಲ್ಲಿರುವ ಪಟ್ಟಿಗಳಂತೆ ಮಾಡಿದರೆ ಹೆಚ್ಚಿನ ಕಸುವನ್ನು ಪಡೆಯಬಹುದು ಜೊತೆಗೆ ಈ ಬಗೆಯ ಪಟ್ಟಿಗಳನ್ನು ಮಾಡಲು ದುಡ್ಡು ಕೂಡಾ ಕಡಿಮೆ ಬೇಕಾಗುವುದೆಂದು ಕಂಡುಕೊಳ್ಳಲಾಗಿದೆ.

suttana_chitte_2

ಹಲಸು ಕಲಿಸಿತು ಗೋಡೆ ಕಟ್ಟುವ ಪಾಟ

ಸಿಂಗಾಪೂರದಲ್ಲಿ ಹೀಗೊಂದು ಒಳಾಂಗಣ ನೆಲೆ ಕಟ್ಟಲು ಹಲಸಿನಂತಿರುವ ಡ್ಯೂರೆನ್ (durian) ಹಣ್ಣಿನ ಹೊರಮಯ್ಯಿ ಮಾದರಿಯಾಗಿದೆ. ಈ ಹಣ್ಣಿನ ಹೊರಮಯ್ಯಿ ಆಕಾರದಲ್ಲಿ ಕಟ್ಟಡವನ್ನು ಮಾಡಿದ್ದರಿಂದ, ಸೂರ್ಯನ ಬೆಳಕು ಬೀಳುವ ಕೋನಕ್ಕೆ ತಕ್ಕಂತೆ  ಅದು ದಿನವಿಡೀ ಹೊಂದಿಕೊಳ್ಳುತ್ತಾ ಹೋಗುತ್ತದೆ. ಇದರಿಂದಾಗಿ ಹಾಯನಿಸುವ ಬೆಳಕಿನ ಮತ್ತು ನೆರಳಿನ ಬೆರೆತ ಈ ಕಟ್ಟಡದಲ್ಲಿ ಉಂಟಾಗಿದೆ.

durian-singapore_3

—————

ಶಾರ್ಕ್ ಪೊರೆ ಹೋಲುವ ಈಜುಡುಗೆ

ಈಜುವಾಗ ಎದುರಾಗುವ ನೀರಿನ ಇದಿರು ಸೆಳೆತವನ್ನು ಕಡಿಮೆ ಮಾಡುವಲ್ಲಿ ಶಾರ್ಕ್ಗಳಿಗೆ ಅವುಗಳ ಪೊರೆ ನೆರವಾಗುತ್ತದೆ. ಇದನ್ನು ಬಳಸಿಕೊಂಡು ಸ್ಪೀಡೋ ಎಂಬ ಕಂಪನಿ ಚುರುಕು-ಈಜುಡುಗೆಗಳನ್ನು ಹೊರತಂದಿದೆ. ಈ ಈಜುಡುಗೆಗಳಲ್ಲಿ ಬರೀ ಪೊರೆಯ ಆಕಾರವನ್ನು ಬಳಸದೇ ಅದರ ಹೊಂದಿಕೊಳ್ಳುವ, ಹೊರಳುವ ಗುಣಗಳನ್ನು ಅಳವಡಿಸಿಕೊಳ್ಳಲಾಗಿದೆ. ಓಲಂಪಿಕ್ ಈಜು ಪೈಪೋಟಿಯಲ್ಲಿಈ ಈಜುಡುಗೆಗಳು ಬಳಕೆಯಾಗಲಿವೆ.

swimm_suit_4

ಕಟ್ಟಡಕ್ಕೆ ಕಳ್ಳಿಗಿಡದ ಹೊಳಹು

ಮರಳುಗಾಡು, ಉರಿ ಬಿಸಿಲಿನ ನಾಡಾದ ಕತಾರನಲ್ಲಿ ಕಳ್ಳಿಗಿಡ (cactus) ಹೋಲುವ ಕಟ್ಟಡವೊಂದು ತಲೆ ಎತ್ತಿದೆ. ಈ ಕಟ್ಟಡದ ತುಂಬಾ ಕಿಟಕಿಗಳನ್ನು ಮಾಡಲಾಗಿದ್ದು, ಗಾಳಿ ಒಳಬಂದು ಕಾವು ಆಚೆ ಹೋಗುವಂತೆ ಅಣಿಗೊಳಿಸಲಾಗಿದೆ. ಈ ಬಗೆಯ ಹೊಳಹು (idea) ಹೊಳೆದದ್ದು ಕಳ್ಳಿಗಿಡ ಮರುಳುಗಾಡಿನಲ್ಲಿಯೂ ನೀರನ್ನು ಕೂಡಿಟ್ಟುಕೊಳ್ಳುವ ತಿಳುವಳಿಕೆಯಿಂದ.

cactus_office_buliding

ಮಿದುಳಿನಿಂದ ಹೊಮ್ಮಿದ ‘ಕಟ್ಟುಜಾಣ್ಮೆ’

 

ತಮ್ಮದೇ ತಿಳುವಳಿಕೆ ಹೊಂದಿರುವ, ಯೋಚನೆಗಳನ್ನು ಮಾಡಬಲ್ಲ ಸಲಕರಣೆಗಳನ್ನು ಹೊಮ್ಮಿಸುವಲ್ಲಿ ಕಟ್ಟುಜಾಣ್ಮೆ (artificial intelligence) ಇತ್ತೀಚಿನ ವರುಶಗಳಲ್ಲಿ ಹೊಸ ಹೊಸ ಮೈಲಿಗಲ್ಲು ದಾಟುತ್ತಿದೆ. ಮಾನವರ ಮತ್ತು ಇತರ ಪ್ರಾಣಿಗಳ ಮಿದುಳಿನ ರಚನೆಯನ್ನು ಅದು ಅಳವಡಿಸಿಕೊಳ್ಳುತ್ತಿದೆ.

AI_6

ಚಿಮ್ಮುಂಡಿ ಹುಳು ಕಾವಲು ಪಡೆಗೆ ತಿಳಿವು

ಅಮೇರಿಕದ ಹಡಗುಪಡೆ (navy) ಎದುರಾಳಿಗಳ ಹಡಗುಗಳನ್ನು ಕಂಡುಹಿಡಿಯಲು ಬಳಸುವ ಉಲಿಕಾವಲು  (Sound Navigation and Ranging-SONAR) ಸಲಕರಣೆಯನ್ನು ಇನ್ನಷ್ಟು ಹದಗೊಳಿಸಲು ಚಿಮ್ಮುಂಡಿ ಹುಳುವಿನ ಮೊರೆಹೋಗಿದೆ. ಚಿಮ್ಮುಂಡಿ ಹುಳು (cricket) ಮಾಡುವ ಸದ್ದು ಹಲವಾರು ಮೈಲಿವರೆಗೆ ಕೇಳಿಸಬಲ್ಲದು. ಚಿಮ್ಮುಂಡಿ ಹುಳುವಿನಂತೆ ಉಲಿಕಾವಲು ಸಲಕರಣೆ ಸದ್ದು ಹೊಮ್ಮಿಸುವಂತಾದರೆ ನೀರಿನೊಳಗೆ ಎದುರಾಳಿಗಳ ಹಡಗುಗಳಿಗೆ ಸದ್ದಿನ ಅಲೆ ತಾಕಿಸಿ, ಅವುಗಳಿಂದ ಮರಳಿ ಬರುವ ಸಂದೇಶಗಳನ್ನು ಒರೆಗೆಹಚ್ಚಿ ಹಡಗುಗಳನ್ನು ಕಂಡುಹಿಡಿಯಬಹುದು. ಅಮೇರಿಕಾದ ಪಡೆ ಈ ನಿಟ್ಟಿನಲ್ಲಿ ಚಿಮ್ಮುಂಡಿ ಹುಳುವಿನ ಗಂಟಲಿನ ಒಳರಚನೆ ಕುರಿತು ಅರಕೆ ನಡೆಸಿದೆ.

USA-CICADAS_7

ಮರಕುಟಿಗ ಹಕ್ಕಿಯ ಹೊಡೆತ ಹೀರುವ ಕಲೆ

ಮರಕುಟಿಗ ಹಕ್ಕಿಯ ಕೊಕ್ಕು ಹೊರಗಡೆ ಗಟ್ಟಿಯಾಗಿದ್ದು, ಒಳಗೆ ಮೆದುವಾಗಿರುವ ಹೊಡೆತ ಹೀರುವ ಎಲುಬುಗಳಿಂದ ಕೂಡಿದೆ. ಹೀಗಾಗಿ ಪ್ರತಿ ಸೆಕೆಂಡಿಗೆ 18-20 ಬಾರಿ ಕೊಕ್ಕುಗಳಿಂದ ಮರವನ್ನು ಕುಟುಕಿದರೂ ಅವುಗಳಿಗೆ ತೊಂದರೆಯಾಗದು. ಇದನ್ನು ಬಳಸಿ ಹೊಸದಾದ ಹೊಡೆತ ಹೀರಿಕೊಳ್ಳುವ ಸಲಕರಣೆಗಳನ್ನು ಹೊರತರಲಾಗುತ್ತಿದೆ. ಮರಕುಟಿಗ ಹಕ್ಕಿಯಿಂದ ಕಲಿತ ಕಲಿಕೆ ಪುಟಬಾಲ್ ಆಟಗಾರರನ್ನು ಹೊಡೆತದಿಂದ ಕಾಪಾಡಲು, ವಿಮಾನವು ತೊಂದರೆಗೆ ಈಡಾದಾಗಿನ ವಿಷಯಗಳನ್ನು ಕೂಡಿಡುವ ಕಪ್ಪುಪೆಟ್ಟಿಗೆಯನ್ನು (black box) ಮಾಡಲು ಕೂಡ ಬಳಕೆಯಾಗುತ್ತಿದೆ.

marakutiga_8

ಹೀಗೆ ನಮ್ಮ ಸುತ್ತಮುತ್ತಲಿನ ಜೀವಿಗಳು ವಾತಾವರಣಕ್ಕೆ ಹೊಂದಿಕೊಳ್ಳಲು ಮಾಡಿಕೊಂಡ ಮಾರ್ಪಾಡುಗಳನ್ನೇ ಅರಿತುಕೊಂಡು, ಸುತ್ತಣಕ್ಕೆ ಯಾವುದೇ ತೊಂದರೆಯನ್ನು ನೀಡದೇ, ನಮ್ಮ ಬದುಕಿನ ಹಲವಾರು ಅಡೆತಡೆಗಳನ್ನು ಮೀರುವ ಚಳಕಗಳನ್ನು ಅಣಕರಿಮೆ ನಮಗೆ ಒದಗಿಸುತ್ತಿದೆ.

ಮಾಹಿತಿ ಸೆಲೆ: http://webecoist.momtastic.com, www.popsci.com, www.wikipedia.com

ಅಡಾಸ್ ಹೇಗೆ ಕೆಲಸ ಮಾಡುತ್ತದೆ?

  By

– ಜಯತೀರ್ಥ ನಾಡಗೌಡ. 

ಅಡಾಸ್ ಏರ್ಪಾಟಿನ ಬಗ್ಗೆ,  ಈ ಹಿಂದೆ, ಬರಹವೊಂದರಲ್ಲಿ ತಿಳಿಸಿದ್ದೆ. ಅಡಾಸ್ ಎಂದರೇನು, ಅದರಲ್ಲಿ ಎಷ್ಟು ಹಂತಗಳು, ಅದರ ಲಾಭ/ನಷ್ಟಗಳ ಬಗ್ಗೆ ಚರ್ಚೆ ಮಾಡಿದ್ದೆ. ಈ ಬರಹದಲ್ಲಿ ಅಡಾಸ್‌ನ ವಿಶೇಷತೆಯೊಂದನ್ನು ಬಳಸಿಕೊಂಡು ಅದು ಹೇಗೆ ಕೆಲಸ ಮಾಡಲಿದೆ ಎಂಬುದರ ಬಗ್ಗೆ ತಿಳಿಯೋಣ ಬನ್ನಿ.

ಅಡಾಸ್ ಏರ್ಪಾಟಿನಲ್ಲಿ ಸುಮಾರು 20+ ಹೆಚ್ಚು ವಿಶೇಷತೆಗಳಿದ್ದು, ಅವುಗಳನ್ನು ವಿವಿಧ ಹಂತದ ಅಡಾಸ್‌ಗೆ ತಕ್ಕಂತೆ ಬಂಡಿ ತಯಾರಕರು ತಮ್ಮ ಮಾರುಕಟ್ಟೆಗೆ ತಕ್ಕಂತೆ ಅಳವಡಿಸಿರುತ್ತಾರೆ. ಬೀದಿಗಳಲ್ಲಿ ಸಾಗುವಾಗ ಜನ/ಜಾನುವಾರುಗಳ ಗುರುತಿಸುವಿಕೆ, ಹೆದ್ದಾರಿಗಳಲ್ಲಿ ಸಾಗುವಾಗ ಲೇನ್ ಬದಲಾವಣೆ ಗುರುತಿಸುವಿಕೆ ಮತ್ತು ಎಚ್ಚರಿಸುವಿಕೆ, ಸಂಚಾರ ದಟ್ಟಣೆಯ ಸಿಗ್ನಲ್ ಗುರುತಿಸುವಿಕೆ, ತುರ್ತು ಸಮಯಗಳಲ್ಲಿ ಗಾಡಿ ತಡೆಯುವಿಕೆ, ದಿಡೀರನೆ ಎದುರಾಗಬಲ್ಲ ತಿರುವುಗಳ ಗುರುತಿಸುವಿಕೆ ಹೀಗೆ ಹಲವು ವಿಶೇಷತೆಗಳಿವೆ.

ಇಲ್ಲಿ ಉದಾಹರಣೆಗೆ ಆಟೋಮ್ಯಾಟಿಕ್ ಎಮೆರ್ಜನ್ಸಿ ಬ್ರೇಕಿಂಗ್(Automatic Emergency Braking) ಅಂದರೆ ತುರ್ತು ಸಮಯಗಳಲ್ಲಿ ಗಾಡಿ ತಡೆಯುವಿಕೆಯ ವಿಶೇಷತೆ ಹೇಗೆ ಕೆಲಸ ಮಾಡಲಿದೆ ನೋಡೋಣ.

  •  ಮೊದಲು ಈ ವಿಶೇಷತೆ ಹೊಂದಿರುವ ಕಾರು, ತನ್ನ ಮುಂದಿರುವ ಕಾರು/ಗಾಡಿಗಳನ್ನು ಗುರುತಿಸುತ್ತದೆ. ಮುಂದಿರುವ ಗಾಡಿ ಕೆಲವೇ ಅಡಿಗಳಷ್ಟು ದೂರವಿದ್ದು, ಗಾಡಿಯ ವೇಗ ಸುಮಾರು 30 ಕಿಮೀ/ಘಂಟೆಗೆ** ಹಾಗೂ ಅದಕ್ಕಿಂತ ಕಡಿಮೆ ಇದೆಯೇ ಎಂಬುದನ್ನು ಅರಿಯುತ್ತದೆ. ಆಗ ಅಡಾಸ್‌ನ ಈ ವಿಶೇಷತೆ, ತುರ್ತು ಬ್ರೇಕಿಂಗ್‌ಗೆ ಸಿದ್ಧಗೊಳ್ಳುತ್ತದೆ.

(**ಇಲ್ಲಿ ತಿಳಿಸಿರುವ ವೇಗದ ಮಿತಿಯು ಕೇವಲ ಉದಾಹರಣೆಗೆ. ವಿವಿಧ ಬಂಡಿ ತಯಾರಕರ ಗಾಡಿಯಲ್ಲಿ ಈ ಮಿತಿಯಲ್ಲಿ ವ್ಯತ್ಯಾಸ ಕಂಡುಬರಬಹುದು.  ಇದು ಗಾಡಿ ತಯಾರಕರ ನಿರ್ಧಾರ)

  •  ಈ ಸಮಯದಲ್ಲಿ ಗಾಡಿ ಓಡಿಸುಗ ಬ್ರೇಕ್ ತುಳಿಗೆಯನ್ನು(Pedal) ತುಳಿಯದೇ ಇದ್ದರೆ, ಓಡಿಸುಗನಿಗೆ ಎಚ್ಚರಿಸಲು ಒಂದೇ ಸಮನೆ ಎಚ್ಚರಿಕೆ ಗಂಟೆ ಕೇಳಿಬರಲಾರಂಭಿಸುತ್ತದೆ ಇಲ್ಲವೇ ಬಂಡಿಯ ತೋರುಮಣೆಯಲ್ಲಿ ಓಡಿಸುಗನಿಗೆ ಕಾಣುವಂತೆ ತುರ್ತು ಸಮಯದ ಸೂಚನೆ ನೀಡುತ್ತದೆ ಇಲ್ಲವೇ ಸಣ್ಣಗೆ ಬ್ರೇಕ್ ಹಾಕಿ ಸುಳಿವು ನೀಡುತ್ತದೆ.
  • ನಂತರ ಗಾಡಿಯ ವೇಗ ಕಡಿತಗೊಳಿಸಿ, ಓಡಿಸುಗ ತುರ್ತು ಪರಿಸ್ತಿತಿಗೆ ಸ್ಪಂದಿಸಲು ತುಸು ಸಮಯ ನೀಡುತ್ತದೆ. ಓಡಿಸುಗ ಕೂಡಲೇ ಬ್ರೇಕ್ ಒತ್ತಿದರೆ, ಬ್ರೇಕ್ ಏರ್ಪಾಟು ಸ್ಪಂದಿಸಲು ಸಹಕಾರ ನೀಡುತ್ತದೆ.
  • ಈ ಪರಿಸ್ತಿತಿಯಲ್ಲಿ ಪ್ರತಿ ಕ್ಷಣದಲ್ಲೂ ಮುಂದಿರುವ ಗಾಡಿಯೊಂದಿಗೆ ಗುದ್ದುವಿಕೆ ತಡೆಯಲು, ಮುಂದಿರುವ ಗಾಡಿಯಿಂದ ಈ ಗಾಡಿ ಎಷ್ಟು ದೂರವಿದೆ ಎಂಬುದರ ಲೆಕ್ಕಾಚಾರ ನಡೆಯುತ್ತಿರುತ್ತದೆ. 
  •  ಆಗಲೂ ಓಡಿಸುಗ ಬ್ರೇಕ್‌ನ ಸಂಪೂರ್ಣವಾಗ ಹಾಕಿ ಗಾಡಿ ತಡೆದು ನಿಲ್ಲಿಸದೇ ಇದ್ದರೆ, ಈ ವಿಶೇಷತೆ ತಾನಾಗಿಯೇ ಬಂಡಿ ತಡೆದು ನಿಲ್ಲಿಸಿ ಆಗಬಲ್ಲ ಅನಾಹುತವನ್ನು ತಡೆಗಟ್ಟುತ್ತದೆ.

ಇದೆಲ್ಲವೂ ಕೆಲವೇ ಕ್ಷಣಗಳಲ್ಲಿ ನಡೆಯುತ್ತದೆ. ಪ್ರತಿ ಮಿಲಿಸೆಕೆಂಡ್‌ಗಳ ಮಾಹಿತಿ ರವಾನೆ ಮತ್ತು ಅದಕ್ಕೆ ಸ್ಪಂದನೆಗಳನ್ನು ಮಾಡಲು ಅಡಾಸ್‌ನ ವಿಶೇಷತೆಯ ಗಣಕಗಳು ಮಾಡುತವೆ. ಇದಕ್ಕೆ ಎಲ್‌ಆರ್‌ಆರ್(LRR) ಅಂದರೆ ಲಾಂಗ್‌ ರೇಂಜ್ ರೇಡಾರ್ ಮತ್ತು ಮುಂಬದಿಯ ಕ್ಯಾಮೆರಾಗಳು ಬಳಸಲ್ಪಡುತ್ತವೆ. ಅಡಾಸ್ ಏರ್ಪಾಟಿನಲ್ಲಿರುವ ರೇಡಾರ್ ಮುಂದಿರುವ ಗಾಡಿ/ಜನರು/ಜಾನುವಾರುಗಳ ದೂರ ಅಳೆಯಲು ನೆರವಾದರೆ, ಕ್ಯಾಮೆರಾಗಳು ಮುಂದಿರುವ ಪರಿಸ್ತಿತಿಯ ನೇರ ನೋಟವನ್ನು ಗಣಕಗಳಿಗೆ ಕಳುಹಿಸುತ್ತ ರೇಡಾರ್ ಜೊತೆ ಒಟ್ಟಾಗಿ ಕೆಲಸ ಮಾಡುತ್ತವೆ.  ಈ ತುರ್ತು ಸಮಯದ ಬ್ರೇಕಿಂಗ್ ವಿಶೇಷತೆಯನ್ನು ಒಂದು ಬ್ಲಾಕ್ ಡೈಗ್ರಾಮ್(Block Diagram) ಮೂಲಕ ತಿಳಿಸಬೇಕೆಂದರೆ ಕೆಳಗಿನಂತಿರುತ್ತದೆ.

ಬಹುತೇಕ ಅಡಾಸ್ ಏರ್ಪಾಟಿನ ವಿಶೇಷತೆಗಳು ಇದೇ ತೆರನಾಗಿ ಕೆಲಸಮಾಡುತ್ತವೆ. ಮೊದಲು ಸುತ್ತಲಿನ ವಾತಾವರಣವನ್ನು ರೇಡಾರ್ ಮುಂತಾದ ಅರಿವಿಕಗಳ ಮೂಲಕ ಅರಿತು, ಅದನ್ನು ಪ್ರಕ್ರಿಯೆಗೊಳಿಸಿ ಓಡಿಸುಗನಿಗೆ ಎಚ್ಚರಿಸಿ, ಕೊನೆಯಲ್ಲಿ ತಕ್ಕ ಕೆಲಸ ಮಾಡುತ್ತವೆ. 

ರಂಗಾಕು – ಜಪಾನಲ್ಲೊಂದು ಅರಿಮೆಯ ಚಳುವಳಿ

  By , , , , , ,

– ಪ್ರಶಾಂತ ಸೊರಟೂರ.

 

ಜಪಾನ್

ಹೆಸರು ಕೇಳಿದೊಡನೆ ನಮ್ಮೆದುರಿಗೆ ನಿಲ್ಲುವುದು ಅದರ ರೊಬೋಟ್‍ಗಳು, ತಾನೋಡಗಳ (automobiles) ಕೈಗಾರಿಕೆಗಳು, ಮುಂಚೂಣಿಯಲ್ಲಿ ನಿಲ್ಲುವ ಅದರ ಅರಕೆಗಳು, ಎಂತದೇ ಅವಘಡಗಳನ್ನು ಎಂಟೆದೆಯಿಂದ ಒಗ್ಗಟ್ಟಾಗಿ, ಜಾಣ್ಮೆಯಿಂದ ಎದುರಿಸುವ ಅದರ ನಾಡಿಗರು.

ಸಂಪನ್ಮೂಲಗಳ ಕೊರತೆಯನ್ನು ಎದುರಿಸಿದರೂ ನಾಡೊಂದು ಹೇಗೆ ಇಷ್ಟೊಂದು ಮುಂದುವರೆಯಿತು? ಹೇಗೆ ಸಾಯನ್ಸ್ ಮತ್ತು ಟೆಕ್ನಾಲಜಿಯಲ್ಲಿ ಅದಿಂದು ಮುನ್ನೆಲೆಗೆ ಬಂತು? ಅನ್ನುವ ಕೇಳ್ವಿಯ ಜಾಡು ಹಿಡಿದು ನಡೆದಾಗ ಹಲವು ಮುಂದುವರೆದ ನಾಡುಗಳಲ್ಲಿ ನಡೆದಂತೆ ಜಪಾನಲ್ಲೂ ಕೂಡ ಅದರ ನುಡಿಯ ಸುತ್ತ ಚಳುವಳಿ ನಡೆದಿರುವುದು, ಅರಿಮೆಯನ್ನು ತನ್ನದಾಗಿಸುವ ಕೆಲಸ ಎಡೆಬಿಡದೇ ಸಾಗಿದ್ದು ಕಾಣುತ್ತದೆ. ಜಪಾನಿನಲ್ಲಿ ನಡೆದ ಅರಿಮೆಯನ್ನು ತನ್ನಾದಾಗಿಸುವ ಅಂತಹ ಕಾಲಘಟ್ಟವೊಂದರ ಬಗ್ಗೆ ಈಗ ತಿಳಿಯೋಣ ಬನ್ನಿ.

ಬೇಲಿಯ ನಾಡು:
ಕ್ರಿ.ಶ. 1633 ರಿಂದ 1853 ರ ಹೊತ್ತಿನಲ್ಲಿ ಜಪಾನ್ ನಾಡಿಗರನ್ನು ಹೊರನಾಡುಗಳ ಒಡನಾಟದಿಂದ ದೂರ ಉಳಿಸಲಾಗಿತ್ತು. ಜಪಾನ್‍ನಿಂದ ಹೊರಹೋಗುವವರನ್ನು ಮತ್ತು ಜಪಾನಿಗೆ ಬೇರೆ ನಾಡಿಂದ ಬರುವವರನ್ನು ನೇಣಿಗೇರಿಸುವಂತಹ ಕಟ್ಟಲೆಗಳು ಆಗ ಜಾರಿಯಲ್ಲಿದ್ದವು. ಹೊರನಾಡುಗಳು ಅದರಲ್ಲೂ ಸ್ಪೇನ್ ಮತ್ತು ಪೋರ್ಚುಗಲ್ ದೇಶಗಳ ಆಳ್ವಿಕೆಯ ಮತ್ತು ಧಾರ್ಮಿಕ ದಾಳಿಯನ್ನು ತಡೆಗಟ್ಟಲು ಜಪಾನ್ ದೊರೆಗಳು ಇಂತಹ ದಾರಿಯನ್ನು ಆಯ್ಕೆಮಾಡಿಕೊಂಡಿದ್ದರು. ಬೇರೆ ನಾಡುಗಳಿಂದ ನೇರವಾದ ಒಡನಾಟ ಕಳಚಲ್ಪಟ್ಟ ಆ ಹೊತ್ತಿನ ಜಪಾನ್‍ನ್ನು ಸಾಕೊಕು (Sakoku) ಅಂದರೆ ಸರಪಳಿಯ ಇಲ್ಲವೇ ಬೇಲಿಯ ನಾಡು ಎಂದು ಕರೆಯಲಾಗುತ್ತದೆ.

ಹೊರನಾಡುಗಳಿಂದ ಜಪಾನಿಗರು ನೇರವಾದ ಒಡನಾಟದಿಂದ ದೂರವಿದ್ದರೂ, ಈ ಹೊತ್ತಿನಲ್ಲಿ ಕೆಲವು ರೇವುಪಟ್ಟಣಗಳಿಂದ ಹೊರದೇಶಗಳೊಡನೆ ವ್ಯಾಪಾರ, ಕೊಡುಕೊಳ್ಳುವಿಕೆಗೆ ಕೆಲವು ಕಟ್ಟುಪಾಡುಗಳೊಂದಿಗೆ ಅವಕಾಶವನ್ನು ನೀಡಲಾಗಿತ್ತು. ನಾಗಾಸಾಕಿ ಊರಿನ ಬಳಿ ಡೆಜಿಮಾ (Dejima) ಎಂಬ ತಾಣವನ್ನು ಇದಕ್ಕಾಗಿ ಅಣಿಗೊಳಿಸಲಾಗಿತ್ತು. ಡೆಜಿಮಾ ಮೂಲಕ ಮುಖ್ಯವಾಗಿ ಡಚ್ಚರು ಜಪಾನಿನೊಡನೆ ಒಳ್ಳೆಯ ನಂಟನ್ನು ಬೆಳಸಿಕೊಂಡರು. ಆಗ ಶುರುವಾದದ್ದೇ ಡಚ್ಚರಿಂದ ಪಡುವಣ ನಾಡುಗಳ ಅರಿಮೆಯ ಸಾರವನ್ನು ಹೀರುವ ಜಪಾನಿಗರ ಚಳುವಳಿ.

rangaku_Dutch_trader_watching_an_incoming_VOC_ship_at_Dejima_by_Kawahara_Keiga

(ಡಚ್ಚರ ಹಡಗನ್ನು ಜಪಾನಿಗೆ ಬರಮಾಡಿಕೊಳ್ಳುತ್ತಿರುವ ತಿಟ್ಟ)

ರಂಗಾಕು – ಚಳುವಳಿ:

ಬೇರೆ ನಾಡುಗಳಿಂದ ಒಡನಾಟ ಕಡಿಯಲ್ಪಟ್ಟಿದ್ದರೂ ಡಚ್ಚರು ಜಪಾನಿಗೆ ಪಡುವಣ ದೇಶದಲ್ಲಿ ನಡೆಯುತ್ತಿರುವ ಅರಿಮೆಯ ಮಾಹಿತಿಯನ್ನು, ಅಲ್ಲಿ ಹುಟ್ಟುತ್ತಿದ್ದ ಸಲಕರಣೆಗಳನ್ನು, ಕೈಗಾರಿಕೆಗಳ ತಿಳುವಳಿಕೆಯನ್ನು ತಮ್ಮ ವ್ಯಾಪಾರದೊಂದಿಗೆ ಹೊತ್ತು ತರುತ್ತಿದ್ದರು. ಹೀಗಾಗಿಯೇ ಜಪಾನ್ ಡಚ್ಚರ ಮೇಲೆ ತನ್ನ ನಂಬಿಕೆಯನ್ನು ಇರಿಸತೊಡಗಿತು, ಅವರಿಂದ ವ್ಯಾಪಾರಾದಾಚೆಗೆ ಪಡುವಣದ ಅರಿವನ್ನು ತನ್ನದಾಗಿಸಿಕೊಳ್ಳುವಲ್ಲಿ ಗೊತ್ತುಗುರಿಯನ್ನು ಇಟ್ಟುಕೊಂಡು ಕೆಲಸ ಮಾಡತೊಡಗಿತು. ಅರಿಮೆಯ ಈ ಕಲಿಯುವಿಕೆಯನ್ನು ಜಪಾನಿನಲ್ಲಿ ರಂಗಾಕು (Rangaku) ಅಂದರೆ ಡಚ್ಚರಿಂದ ಕಲಿಯುವಿಕೆ ಇಲ್ಲವೇ ಪಡುವಣದಿಂದ ಕಲಿಯುವಿಕೆ (Western learning) ಎಂದು ಕರೆಯಲಾಗುತ್ತದೆ.

ಚಳುವಳಿಯ ಮೊದಲ ಹಂತ:

ಪಡುವಣದಿಂದ ಕಲಿಯುವ ಅರಿಮೆಯ ಚಳುವಳಿಯಾದ ರಂಗಾಕುವಿನ ಮೊದಲ ಹಂತವನ್ನು 1640–1720 ಎಂದು ಗುರುತಿಸಲಾಗುತ್ತದೆ. ಈ ಹಂತದಲ್ಲಿ ಕಲಿಯುವಿಕೆ ತುಂಬಾ ಹಿಡಿತದಲ್ಲಿತ್ತು ಅನ್ನಬಹುದು. ಕಡಲ ಮತ್ತು ಮದ್ದರಿಮೆಯ ವಿಷಯಗಳನ್ನು ಬಿಟ್ಟು ಬೇರೆಲ್ಲ ಬಗೆಯ ಪಡುವಣದ ಹೊತ್ತಗೆಗಳನ್ನು ತಡೆಹಿಡಿಯಲಾಗಿತ್ತು. ಮೊದಲ ಹಂತವಾಗಿ ಜಪಾನ್ ಮತ್ತು ಡಚ್ ನುಡಿ ಬಲ್ಲವರನ್ನು ಹೊತ್ತಗೆಗಳ ಅನುವಾದಕ್ಕೆ ಅಣಿಗೊಳಿಸಲಾಗಿತ್ತು. ಇವರ ಕೆಲಸವೆಂದರೆ ಡಚ್ಚರು ಒದಗಿಸುವ ತಿಳುವಳಿಕೆಯನ್ನು ಜಪಾನಿ ನುಡಿಗೆ ಅನುವಾದಿಸುವುದು. ಪ್ರತಿ ವರುಶ ಜಪಾನಿಗೆ ಬರುವಾಗ ಡಚ್ಚರು ಪಡುವಣ ದೇಶಗಳಲ್ಲಿ ಏನು ನಡೆದಿದೆ, ಯಾವ ಬಗೆಯ ಕೈಗಾರಿಕೆಗಳು, ಅರಿಮೆಯ ಏಳಿಗೆಗಳು ನಡೆದಿವೆ ಅನ್ನುವುದನ್ನು ಜಪಾನಿಗರಿಗೆ ತಿಳಿಸಲು ಕೋರಲಾಯಿತು. ಇದರ ಬದಲಾಗಿ ಡಚ್ಚರಿಗೆ ತಮ್ಮ ಸರಕುಗಳನ್ನು ಮಾರಾಟ ಮಾಡಲು ಹೆಚ್ಚಿನ ಅವಕಾಶಗಳನ್ನು ಒದಗಿಸಲಾಯಿತು.

ಮೊದಲಿಗೆ ಡಚ್ಚರಿಂದ ಪಡೆದ ಹೊತ್ತಗೆಗಳು ಜಪಾನಿ ನುಡಿಗೆ ಅನುವಾದಿಸಲ್ಪಟ್ಟರೆ, ಬರಬರುತ್ತಾ ಡಚ್ಚರು ಹೊತ್ತು ತರುತ್ತಿದ್ದ ದೂರತೋರುಕಗಳು (telescopes), ಗಡಿಯಾರಗಳು, ಸೀರುತೋರ‍್ಪುಗಳು (microscopes), ನಾಡತಿಟ್ಟಗಳು (maps/globes), ಕನ್ನಡಕಗಳು ಮುಂತಾದ ಸಲಕರಣೆಗಳ ಮಾರಾಟ ಹೆಚ್ಚತೊಡಗಿತು. ಅವುಗಳ ಬಳಕೆಯ ಬಗ್ಗೆ ಜಪಾನಿಗರು ತುಂಬಾ ನಲ್ಮೆಯಿಂದ ಡಚ್ಚರಿಂದ ಕಲಿತರು.

rangaku_microscope

(ಮೈಕ್ರೋಸ್ಕೋಪ್ ಬಗ್ಗೆ ತಿಳಿಸುತ್ತಿರುವ ಜಪಾನಿ ಹೊತ್ತಗೆ)

ಚಳುವಳಿಯ ಎರಡನೆ ಹಂತ:

1720-1839 ರ ಹಂತವನ್ನು ಕಲಿಕೆಯ ಎರಡನೆಯ ಹಂತವೆಂದು ಗುರುತಿಸಲಾಗುತ್ತದೆ. ಈ ಹಂತದಲ್ಲಿ ಪಡುವಣದ ಹಲವಾರು ಅರಿಮೆಯ ಹೊತ್ತಗೆಗಳು ತುಂಬಾ ಬಿರುಸಿನಿಂದ ಜಪಾನಿ ನುಡಿಗೆ ಅನುವಾದಿಸಲ್ಪಟ್ಟವು. ಇದರಲ್ಲಿ ತುಂಬಾ ಮುಖ್ಯವಾದ ಹೊತ್ತಗೆ ಎಂದರೆ ಮೊರಿಶಿಮಾ ಎಂಬುವವರು ಜಪಾನಿ ನುಡಿಗೆ ಅನುವಾದಿಸಿದ ’ಡಚ್ಚರ ಹೇಳಿಕೆಗಳು’ (Sayings of the Dutch). ಈ ಹೊತ್ತಗೆಯಲ್ಲಿ ಮೈಕ್ರೋಸ್ಕೋಪ್ ಕೆಲಸ ಮಾಡುವ ಬಗೆ, ಬಿಸಿ ಗಾಳಿಚಂಡಿನ ಅರಿಮೆಯ ಹಿನ್ನೆಲೆ, ಪಡುವಣದಲ್ಲಿರುವ ಬೇನೆಗಳ ಮತ್ತು ಅವುಗಳನ್ನು ಗುಣಪಡಿಸುವ ಮದ್ದರಿಮೆಯ ತಿಳುವಳಿಕೆ, ಹಡಗುಗಳ ಕಟ್ಟಣೆ, ಮಿಂಚರಿಮೆಯ ಅರಿವು ಮುಂತಾದ ಹತ್ತು ಹಲವಾರು ತಿಳುವಳಿಕೆಯನ್ನು ಜಪಾನಿ ನುಡಿಯಲ್ಲಿ ತಿಳಿಸಲಾಯಿತು.

rangaku_First_Japanese_treatise_on_Western_anatomy

(ಮದ್ದರಿಮೆಯ ಬಗ್ಗೆ ಬರೆಯಲಾದ ಮೊದಲ ಜಪಾನಿ ಹೊತ್ತಗೆ)

rangaku_RangakuElectricityManual

(ಇಲೆಕ್ಟ್ರಿಸಿಟಿ ಬಗ್ಗೆ ಬರೆಯಲಾದ ಮೊದಲ ಜಪಾನಿ ಹೊತ್ತಗೆ)

1804 ರಿಂದ 1829 ರ ಹೊತ್ತಿನಲ್ಲಿ ಜಪಾನಿನಲ್ಲಿ ಹಲವಾರು ಶಾಲೆಗಳು ತೆರೆಯಲ್ಪಟ್ಟವು. ಈ ಮೂಲಕ ಮೊದಲ ಹಂತಕ್ಕಿಂತ ಬಿರುಸಾಗಿ ಎರಡನೇ ಹಂತದಲ್ಲಿ ಜಪಾನಿಗರು ತಮ್ಮ ನುಡಿಯಲ್ಲಿ ದೊರೆತ ಪಡುವಣದ ಅರಿಮೆಯ ಸಾರವನ್ನು ಹೀರತೊಡಗಿರದರು.

ಚಳುವಳಿಯ ಮೂರನೆಯ ಹಂತ:

1829 ರ ಈಚೆಗಿನ ಹಂತವನ್ನು ಪಡುವಣದಿಂದ ಕಲಿಯುವಿಕೆಯ ಮೂರನೆಯ ಹಂತವೆಂದು ಗುರುತಿಸಲಾಗುತ್ತದೆ. ಈ ಹಂತದಲ್ಲಿ ರಂಗಾಕು ಚಳುವಳಿ ರಾಜಕೀಯ ವಲಯದಲ್ಲಿ ಹೆಚ್ಚು ಚರ್ಚೆಗೆ ಒಳಗಾಯಿತು. ಪಡುವಣದೊಂದಿಗೆ ಒಡನಾಟ ಜಪಾನಿಗರಿಗೆ ಒಳ್ಳೆಯದೇ ಹೊರತು ಕೆಡುಕಿನದಲ್ಲ ಅನ್ನುವಂತ ಮಾತುಗಳು ಹೆಚ್ಚಾಗಿ ಕೇಳತೊಡಗಿದವು. ಬೇಲಿಯ ನಾಡಾಗಿದ್ದ ಜಪಾನನ್ನು ಪಡುವಣದ ಮತ್ತು ಇತರ ಹೊರಜಗತ್ತಿನ ಕಲಿಕೆಗೆ ತೆರವುಗೊಳಿಸಬೇಕು ಅನ್ನುವ ಕೂಗುಗಳು ಕೇಳಿಸಿದವು.

ಮುಂದಿನ ಕೆಲವು ವರುಶಗಳಲ್ಲಿ ಜಪಾನ್ ಇಡಿ ಜಗತ್ತಿಗೆ ತೆರೆದುಕೊಳ್ಳುವುದಕ್ಕೆ ಮುಂಚಿತವಾಗಿಯೇ ರಂಗಾಕು ಚಳುವಳಿ ಜಪಾನಿಗರ ಅರಿಮೆಗೆ ಒಳ್ಳೆಯ ಅಡಿಪಾಯವನ್ನು ಹಾಕಿಕೊಟ್ಟಿತ್ತು.

ಚಳುವಳಿಯಲ್ಲಿ ಪದಕಟ್ಟಣೆ:

ಪಡುವಣದಿಂದ ತಿಳುವಳಿಕೆಯನ್ನು ತಮ್ಮದಾಗಿಸಿಕೊಳ್ಳಲು ಹಾತೊರೆದ ಜಪಾನಿಗರು ಮೊದಲು ಅವುಗಳನ್ನು ತಮ್ಮ ನುಡಿಗೆ ತರುವಂತಾಗಲು ಪದಕಟ್ಟಣೆಯಲ್ಲಿ ತುಂಬಾ ಬಿರುಸಿನಿಂದ ತೊಡಗಿದರು. ಮದ್ದರಿಮೆ (medical science) , ಇರುವರಿಮೆ (physical science), ಮಿಂಚರಿಮೆ (electrical science), ಇರ‍್ಪರಿಮೆ (chemistry), ಬೆಳಕರಿಮೆ (optics), ಉಸಿರಿಯರಿಮೆ (biology), ಬಾನರಿಮೆ (astronomy), ಚಳಕದರಿಮೆ (mechanical engineering) ಮುಂತಾದ ಹತ್ತು ಹಲವಾರು ಅರಿಮೆಯ ಕವಲುಗಳಲ್ಲಿ ದೊರೆತ ಪಡುವಣದ ಅರಿವನ್ನು ತಿಳಿಸಲು ಜಪಾನಿಗರು ಸಾವಿರಾರು ಜಪಾನಿ ಪದಗಳನ್ನು ಹುಟ್ಟುಹಾಕಿದರು.

ಶಿಜುಕಿ (Shizuki) ಎಂಬುವವರು ಫಿಸಿಕ್ಸ್ ವಿಷಯದ ಪದಗಳಿಗೆ ಜಪಾನಿ ಪದಗಳನ್ನು ಕಟ್ಟಿದರೆ, ಉಡಗವಾ ಯೊನ್ (Udagawa Yōan) ಎಂಬುವವರು ಕೆಮಿಸ್ಟ್ರಿಯಲ್ಲಿ ಪದಗಳನ್ನು, ಹಶಿಮೋಟೋ ಮುನಿಯೋಶಿ (Hashimoto Muneyoshi) ಮಿಂಚರಿಮೆಯ ಪದಗಳನ್ನು ಜಪಾನಿ ನುಡಿಯಲ್ಲಿ ಟಂಕಿಸಿದರು. ಒಟ್ಟಾರೆಯಾಗಿ ಈ ಚಳುವಳಿಯಲ್ಲಿ ಅರಿಮೆಯ ಪದಗಳ ಹಾಲ್ಗಡಲೇ ಹರಿಯೆತೆಂದರೆ ತಪ್ಪಾಗಲಾರದು. ಹೀಗೆ ಕಟ್ಟಲ್ಪಟ್ಟ ಜಪಾನಿ ಪದಗಳನ್ನು ಬಳಸಿಕೊಂಡು ಜಪಾನಿಗರು ಹಲವಾರು ಹೊತ್ತಗೆಗಳನ್ನು ಬರೆದರು. ಈ ಮೂಲಕ ಅರಿಮೆಯನ್ನು ತಮ್ಮ ನುಡಿಯಲ್ಲೇ ಎಲ್ಲರಿಗೂ ಎಟುಕುವಂತೆ ಮಾಡಿದರು.

ಕನ್ನಡಿಗರಿಗೆ ರಂಗಾಕು ಕಲಿಸುವ ಪಾಠ:

ಜಪಾನಿಗರ ರಂಗಾಕು ಚಳುವಳಿಯಿಂದ ಕನ್ನಡಿಗರು ಕಲಿಯಬೇಕಾದ ಮುಖ್ಯ ಪಾಠವೆಂದರೆ, ಜಗತ್ತಿನ ಯಾವುದೇ ಮೂಲೆಯಲ್ಲಿರುವ ತಿಳುವಳಿಕೆಯನ್ನಾಗಲಿ ತಮ್ಮ ನುಡಿ ಸಮಾಜಕ್ಕೆ ತಲುಪಿಸಬೇಕೆಂದರೆ, ಆ ತಿಳುವಳಿಕೆಯನ್ನು ತಮ್ಮ ನುಡಿಗೆ ತರುವಂತಹ ಕೆಲಸ ಆಗಬೇಕು.

ಆದರೆ ಕನ್ನಡಿಗರು ಇಂದು ಇದರ ಎದುರಾದ ನಿಲುವನ್ನು ಹೊಂದಿರುವಂತಿದೆ. ಇಂಗ್ಲಿಶಲ್ಲಿ ಇಲ್ಲವೇ ಇನ್ನೊಂದು ನುಡಿಯಲ್ಲಿರುವ ತಿಳುವಳಿಕೆಯನ್ನು ತಮ್ಮದಾಗಿಸಿಕೊಳ್ಳಲು ಇಡಿ ಕನ್ನಡ ನುಡಿ ಸಮಾಜ ಇಂಗ್ಲಿಶ್ ಕಲಿಯಬೇಕು ಅನ್ನುವಂತ ತಪ್ಪು ತಿಳುವಳಿಕೆಯನ್ನು ಹೊಂದಿದೆ. ಇದರ ಬದಲಾಗಿ ಹೊರಜಗತ್ತಿನ ಅರಿವನ್ನು ಕನ್ನಡಕ್ಕೆ ತರುವ ಕೆಲಸ ತುಂಬಾ ಮುಖ್ಯ ಅನ್ನುವುದನ್ನು ಇಂದು ಮನಗಾಣಬೇಕಿದೆ ಮತ್ತು ಈ ನಿಟ್ಟಿನಲ್ಲಿ ಕನ್ನಡಿಗರು ಎಡೆಬಿಡದೇ ತೊಡಗಬೇಕಿದೆ.

(ಮಾಹಿತಿ ಮತ್ತು ತಿಟ್ಟಗಳ ಸೆಲೆ: http://en.wikipedia.org/wiki/Rangaku , japan-experience.com)

ಇವಿ ಕೊಳ್ಳುವಿಕೆಯ ಸಮಸ್ಯೆ ಮತ್ತು ಪರಿಹಾರ (2ನೇ ಕಂತು)

  By

– ಜಯತೀರ್ಥ ನಾಡಗೌಡ. 

ಹಿಂದಿನ ಬರಹದಲ್ಲಿ ಇವಿ ಕೊಳ್ಳುವಿಕೆಯ ಸಮಸ್ಯೆಗಳ ಬಗ್ಗೆ ಚರ್ಚಿಸಿದ್ದೆ. ಈಗ ಅವುಗಳ ಪರಿಹಾರದತ್ತ ಒಂದು ನೋಟ ಬೀರೋಣ.

  1. ಇವಿಗಳ ಆರಂಭಿಕ ಬೆಲೆ ದುಬಾರಿಯಾದರೂ, ಓಡಿಸಲು ಮತ್ತು ಇವುಗಳನ್ನು ನಿರ್ವಹಿಸುವ ಬೆಲೆ ಪೆಟ್ರೋಲ್/ಡೀಸೇಲ್ ವಾಹನಗಳಿಗಿಂತ ಕಡಿಮೆ. ಪೆಟ್ರೋಲ್ ಮುಂತಾದ ಮುಗಿದುಹೋಗಬಲ್ಲ ಉರುವಲುಗಳ ಬೆಲೆ ಪದೇ ಪದೇ ಏರಿಕೆ ಕಂಡಿದೆ. ಇದರಿಂದ ಪೆಟ್ರೋಲ್/ಡೀಸೇಲ್ ಗಾಡಿಗಳ ಉರುವಲಿನ ಬೆಲೆ ಮತ್ತು ಅವು ಕೊಡುವ ಮೈಲಿಯೋಟಗಳನ್ನು, ಇವಿ ವಾಹನವೊಂದರ ವಿದ್ಯುತ್ ಚಾರ್ಜಿಂಗ್ ಬೆಲೆಗೆ ತಾಳೆ ಹಾಕಿದರೆ, ಇವಿ ಬಂಡಿಗಳು ಅಗ್ಗವೇ ಸರಿ.

ಇನ್ನೂ ನಿರ್ವಹಣಾ ವೆಚ್ಚದತ್ತ ನೋಟ ಹರಿಸಿದರೆ, ಇವಿ ಗಾಡಿಗಳಲ್ಲಿ ಹೆಚ್ಚಿನ ಮೆಕ್ಯಾನಿಕಲ್ ಬಿಡಿಭಾಗಗಳು ಇರುವುದಿಲ್ಲ ಹೀಗಾಗಿ ಹೆಚ್ಚಾಗಿ ಕೀಲೆಣ್ಣೆ ಬಳಕೆಯೂ ಹೆಚ್ಚಾಗಿರುವುದಿಲ್ಲ. ಇದರಲ್ಲೂ, ಇವಿಗಳು ಅಗ್ಗವೆನಿಸುತ್ತವೆ.

ಇದಲ್ಲದೇ, ಹಲವು ಇವಿ ತಯಾರಕರು ಇದೀಗ ಬಾಸ್(BaaS -Battery as a Service) ಎಂಬ ಆಯ್ಕೆಯನ್ನು ಕೊಳ್ಳುಗರಿಗೆ ಪರಿಚಯಿಸಿದ್ದಾರೆ. ಈ “ಬಾಸ್” ಆಯ್ಕೆಯಲ್ಲಿ, ಬಂಡಿಯ ಬೆಲೆ ಸುಮಾರು ಅರ್ಧದಶ್ಟು ಇರುತ್ತದೆ.  ಕೊಳ್ಳುಗರು ಈ ಅರ್ಧದಷ್ಟು ಬೆಲೆ ನೀಡಿ ಬಂಡಿಯನ್ನು ತಮ್ಮದಾಗಿಸಿ ಕೊಳ್ಳಬಹುದು. ನಂತರ ಇವರು ಬಳಸಿದಶ್ಟು ಕಿ.ಮೀ.ಗೆ ಹಣತೆರುವ ಏರ್ಪಾಡಿದು. ಈ ರೀತಿ ಬಾಸ್ ಆಯ್ಕೆಯಲ್ಲಿ ಬಂಡಿ ಖರೀದಿಸಿದವರು ಬ್ಯಾಟರಿ ಪ್ಯಾಕ್ ಬಿಟ್ಟು ಬಂಡಿಯ ಎಲ್ಲವೂ ಅವರದೇ. ಮಿಂಕಟ್ಟಿನ ಗೂಡು(ಬ್ಯಾಟರಿ ಪ್ಯಾಕ್) ಮಾತ್ರ ಭೋಗ್ಯಕ್ಕೆ(Lease) ಪಡೆದಂತೆ. ಈ ಬಾಸ್ ಏರ್ಪಾಟಿನಲ್ಲಿ, ಗಾಡಿ ತಯಾರಕರು ವಿವಿಧ ಹಣಕಾಸು ಸಂಸ್ಥೆಗಳೊಂದಿಗೆ ಪಾಲುಗಾರಿಕೆಯಲ್ಲಿ ಈ ಆಯ್ಕೆಯನ್ನು ನೀಡುತ್ತಾರೆ. ಇದರಲ್ಲಿ ಭಾಗಿಯಾದ ಹಣಕಾಸು ಸಂಸ್ಥೆಗಳು,

  • ತಿಂಗಳು ಇಂತಿಷ್ಟು (ಮೊದಲೇ ನಿಗದಿಸಿಪಡಿಸಿದ) ಹಣ ನೀಡುವ, ಇಲ್ಲವೇ
  • ಕೊಳ್ಳುಗ ಗಾಡಿಯನ್ನು ಓಡಿಸಿದಷ್ಟು ಕಿಲೋಮೀಟರ್‌ಗಳಿಗೆ ಹಣಕಟ್ಟಬೇಕಾದ ಆಯ್ಕೆಗಳನ್ನು ನೀಡುತ್ತಾರೆ.
  • ಇದು ಬೇಡವೆಂದರೆ, ಮಿಂಕಟ್ಟಿನ ಗೂಡಿನಲ್ಲಿ ಹುರುಪು ಖಾಲಿಯಾದಾಗ ಹತ್ತಿರ ಸ್ವಾಪ್ ಸ್ಟೇಶನ್ ಗೆ (ಬ್ಯಾಟರಿ ಬದಲಿಸಿಕೊಳ್ಳುವ ತಾಣ) ಹೋಗಿ ಖಾಲಿಯಾದ ಬ್ಯಾಟರಿಯನ್ನು, ಹುರುಪು ತುಂಬಿದ ಬ್ಯಾಟರಿಗೆ ಬದಲಿಸಿ ಪಡೆಯುವ ಆಯ್ಕೆಯೂ ಇದೆ. ಇದು ನಾವು ದಿನದ ಅಡುಗೆಗೆ ಬಳಸುವ ಎಲ್‌ಪಿಜಿ ಸಿಲಿಂಡರ್ ಬದಲಿಸಿದಂತೆನ್ನಬಹುದು.

ಬಾಸ್‌ನ ವಿವಿಧ ಆಯ್ಕೆಗಳನ್ನು ಕೊಳ್ಳುಗರು ಗಾಡಿಯ ಮಾರಾಟಗಾರರಲ್ಲಿ ಸಂಪರ್ಕಿಸಿ ತಮ್ಮ ಅಗತ್ಯ, ಇಷ್ಟದ ಆಯ್ಕೆಗಳನ್ನು ಪಡೆಯಬಹುದು. ಚೀನಾ ದೇಶವೇ ಈ ಬಾಸ್ ಸೇವೆಯನ್ನು ಮಾರುಕಟ್ಟೆ ಮೊದಲು ತಂದಿತ್ತು, ಇದು ತಕ್ಕ ಮಟ್ಟಿಗೆ ಗೆಲುವು ಪಡೆದಿತ್ತು. ಬಾಸ್ ಮೂಲಕ ಇವಿ ಕೊಳ್ಳುಗರಿಗೆ ಆರಂಭಿಕ ಬೆಲೆಯ ಹೊರೆ ಕಡಿಮೆಯಾಗುವುದು ದಿಟ. ಭಾರತದಲ್ಲಿ ಎಮ್‌ಜಿ ಮೋಟಾರ್ಸ್ ಆಯ್ದ ಕಾರುಗಳಲ್ಲಿ ಈ ಸೇವೆ ಪರಿಚಯಿಸಿದ್ದರೆ, ಇಗ್ಗಾಲಿ ಬಂಡಿಗಳಲ್ಲಿ ಹಿರೋ ಮೋಟೋ ಕಾರ್ಪ್ ಕೂಟದವರು ತಮ್ಮ ಹೊಸದಾದ ವಿಡಾ ಗಾಡಿಗಳಿಗೆ ಈ ಬಾಸ್ ಸೇವೆಯನ್ನು ನೀಡುತ್ತಿದ್ದಾರೆ.

  1. ಹಿಂದಿನ ಬರಹದಲ್ಲಿ ಹಲಮಹಡಿ ಕಟ್ಟಡಗಳಲ್ಲಿ ಚಾರ್ಜಿಂಗ್ ಸಮಸ್ಯೆಯ ಬಗ್ಗೆ ಹೇಳಿದ್ದೆ. ಈಗ ಹೊಸದಾಗಿ ಬರುತ್ತಿರುವ ಹಲವು ಇವಿಗಳು ಚಾರ್ಜಿಂಗ್‌ನ ಸಮಸ್ಯೆಗೆ ಹೊಸ ದಾರಿಕೊಂಡಿವೆ. ಗಾಡಿಯಿಂದ ಬಿಡಿಸಿ ಮಿಂಕಟ್ಟನ್ನು ಹೊರತೆಗೆದು ಮನೆಯಲ್ಲಿಯೇ ಚಾರ್ಜಿಂಗ್ ಮಾಡಿಕೊಳ್ಳುವ ಏರ್ಪಾಟು, ಮನೆಯ ಯಾವುದೇ ಕೋಣೆಯ 5A ಸಾಕೆಟ್ ನಿಂದಲೇ ಚಾರ್ಜ್ ಮಾಡಬಹುದಾದ ಆಯ್ಕೆ ನೀಡುತ್ತಿವೆ. ದೊಡ್ಡ ದೊಡ್ಡ ಅಪರಾರ್ಟ್‌ಮೆಂಟ್‌ಗಳಲ್ಲಿ ಪ್ರತಿ ಬಳಕೆದಾರರಿಗೆ ಅನುವಾಗುವಂತೆ, ಅವರ ವಿದ್ಯುತ್ ಮೀಟರ್‌ಗೆ ಜೋಡಿಸಬಲ್ಲ, ಗೋಡೆಗೆ ಅಳವಡಿಸುವ ಚಾರ್ಜಿಂಗ್ ಏರ್ಪಾಟನ್ನು ಹಲವು ತಯಾರಕರು ನೀಡುತ್ತಿದ್ದಾರೆ. 

ಇದಲ್ಲದೇ ಹೆಚ್ಚುತ್ತಿರುವ ಎಲೆಕ್ಟ್ರಿಕ್ ಗಾಡಿಗಳಿಗೆ ಅನುವಾಗಲೆಂದು, ಸರಕಾರ-ಖಾಸಗಿ ಕೂಟಗಳ ನೆರವಿನೊಂದಿಗೆ ನಗರ, ಪಟ್ಟಣ, ಹೆದ್ದಾರಿಗಳಲ್ಲಿ ಚಾರ್ಜಿಂಗ್ ಏರ್ಪಾಟು ಒದಗಿಸುವುದರೊಂದಿಗೆ ಅವುಗಳ ಸಮಯಕ್ಕೆ ತಕ್ಕ ನಿರ್ವಹಣೆಯನ್ನು ಮಾಡುವ ಕೆಲಸ ಮಾಡುತ್ತಿರುವುದು ಇವಿ ಕೊಳ್ಳಬೇಕೆಂದಿರುವವರಿಗೆ ಸಿಹಿ ಸುದ್ದಿ. ಇನ್ನೂ ನಗರ, ಪಟ್ಟಣ, ಹೆದ್ದಾರಿಗಳಲ್ಲಿರುವ ಚಾರ್ಜಿಂಗ್ ತಾಣಗಳ ಮಾಹಿತಿ ನೀಡುವ ಆಪ್‌ಗಳು , ಆಯಾ ತಾಣಗಳು ಪೂರ್ಣವಾಗಿ ಕೆಲಸ ಮಾಡುತ್ತಿವೆಯೇ ಇಲ್ಲವೇ ಮುಚ್ಛಿವೆಯೇ ಎಂಬ “Real Time” ಮಾಹಿತಿ ನೀಡುವ ನಿಟ್ಟಿನಲ್ಲಿ ಕೆಲಸ ಮಾಡುತ್ತಿವೆ. ಹರವಿನ ದುಗುಡಕ್ಕೆ (Range Anxiety) ಇದು ಪರಿಹಾರ ನೀಡಲಿದೆ.

  1. ಮರುಮಾರಾಟದ ಬೆಲೆ: ಬಹುತೇಕ ಇವಿಗಳು ಸುಮಾರು 8-10 ವರುಶಗಳಲ್ಲಿ ಹೆಚ್ಚೆಂದರೆ 8-15% ಮಾತ್ರ ತಾಳಿಕೆಯಲ್ಲಿ ಕಡಿಮೆಯಾಗುತ್ತೆಂದು ಹಲವು ಇವಿ ಪರಿಣಿತರು, ಬ್ಯಾಟರಿ ಅರಕೆಗಾರರು ತೋರಿಸಿಕೊಡುತ್ತಿದ್ದಾರೆ. ಈ ಮಾಹಿತಿ ಸಾಮಾನ್ಯ ಜನತೆ, ಇವಿ ಕೊಳ್ಳುಗರು-ಮಾರಾಳಿಗರಿಗೂ ಹೆಚ್ಚು ಮನವರಿಕೆಯಾದರೆ, ಮರುಮಾರಾಟಗಳು ಸುಲಭವಾಗುವ ಸಾಧ್ಯತೆಯಿದೆ.
  2. ಕೊನೆಯದಾಗಿ, ಮಾರಾಟದ ನಂತರದ ನೆರವು ಮತ್ತು ಬೆಂಬಲದ ಬಗ್ಗೆ, ಇವಿ ತಯಾರಕರು ಹೆಚ್ಚು ಕೆಲಸ ಮಾಡಬೇಕಿದೆ. ಗಾಡಿಗಳ ರಿಪೇರಿ, ಸರ್ವೀಸ್ ಮಾಡಲು ಹೆಚ್ಚಿನ ಸಿಬ್ಬಂದಿಯನ್ನು ನೇಮಿಸಿ ಮೇಲಿಂದ ಮೇಲೆ ತರಬೇತಿಗಳ ಮೂಲಕ ಅವರನ್ನು ಪಳಗಿಸಬೇಕಿದೆ.

ತಿಟ್ಟ ಸೆಲೆ: diyguru.org

ಮೈಯೊಂದು ಕನ್ನಡಿ

  By , , , ,

ಪ್ರಶಾಂತ ಸೊರಟೂರ.

  • ಸಿಟ್ಟಿನಿಂದ ಆತನ ಮೋರೆ ಕೆಂಡದಂತಾಗಿತ್ತು.
  • ನಲ್ಲನ ಮಾತಿಗೆ ನಲ್ಲೆಯ ಕಣ್ಣುಗಳು ನಾಚಿ ನೀರಾದವು.
  • ಏನಾದಿತೋ ಎಂಬ ಅಂಜಿಕೆಯಿಂದ ಆತನ ಕೈ-ಕಾಲುಗಳು ನಡುಗುತ್ತಿದ್ದವು.
  • ಆ ಮಾತನ್ನು ಕೇಳಿ ಅಲ್ಲಿ ನೆರೆದವರೆಲ್ಲಾ ಬೆರಗಿನಿಂದ ಹುಬ್ಬೇರಿಸಿದರು.
  • ಅವರಲ್ಲಿ ಯಾವುದೋ ಕೊರಗಿದೆಯಂತಾ ಅವರ ಬಾಡಿದ ಮುಖವೇ ಹೇಳುತ್ತಿದೆ.
  • ಹೆಮ್ಮೆಯಿಂದ ಎದೆಯುಬ್ಬಿಸಿ ತನ್ನವರ ಕುರಿತು ಆತ ತಿಳಿಸಿಕೊಡುತ್ತಿದ್ದ.

ಇಂತಹ ಹಲವಾರು ಸಾಲುಗಳನ್ನು ಬದುಕಿನಲ್ಲಿ ಕಂಡ ಇಲ್ಲವೇ ಕತೆ-ಕಾದಂಬರಿಗಳಲ್ಲಿ ಓದಿದ ಅನುಭವ ನಿಮಗಾಗಿರಬಹುದು. ಬೇರೆ ಬೇರೆ ಭಾವನೆಗಳಿಗೆ ನಮ್ಮ ಮೈಯಲ್ಲಿ ಬದಲಾಣೆಗಳಾಗುತ್ತವೆ ಅಂತಾ ಗೊತ್ತಿದ್ದರೂ ಅವುಗಳಿಗೆ ಕರಾರುವಕ್ಕಾದ ನಂಟನ್ನು ತೋರಿಸಬಹುದೇ? ಭಾವನೆ ಮತ್ತು ಮೈಯಿಯ ನಂಟು ನಡೆ-ನುಡಿಗಳಿಗೆ, ನಾಡಿಗೆ ತಕ್ಕಂತೆ ಬೇರೆಯಾಗಿರುತ್ತದೆಯೇ? ಅನ್ನುವಂತ ಕೇಳ್ವಿಗಳು ಅರಿಗರನ್ನು ಹಿಂದಿನಿಂದಲೂ ಕಾಡಿದಂತವು.

ಈ ನಿಟ್ಟಿನಲ್ಲಿ ನಡೆದ ಅರಕೆಯೊಂದು ಬೆಳಕುಚೆಲ್ಲಿದ್ದು, ಮೊಟ್ಟಮೊದಲ ಬಾರಿಗೆ ಭಾವನೆಗೆ ತಕ್ಕಂತೆ ನಮ್ಮ ಮೈಯಿಯ ಯಾವ-ಯಾವ ಭಾಗಗಳು ಹೆಚ್ಚು ಹುರುಪುಗೊಳ್ಳುತ್ತವೆ ಎಂದು ತೋರಿಸಿಕೊಟ್ಟಿದೆ. ಇದರ ಜತೆಗೆ ಭಾವನೆಗಳಿಗೆ ಮೈ  ನಡೆದುಕೊಳ್ಳುವ ರೀತಿಯಲ್ಲಿ ನಾಡುಗಳ ಎಲ್ಲೆಗಳಾಚೆ ಹಲವಾರು ವಿಷಯಗಳಲ್ಲಿ ಒಂತನವಿರುವುದು ಈ ಅರಕೆಯಲ್ಲಿ ಕಂಡುಬಂದಿದೆ. ಈ ಅರಕೆಯ ದೊರೆತಗಳನ್ನು (results) ಅಮೇರಿಕಾದ ನ್ಯಾಶನಲ್ ಆಕಾಡಮಿ ಆಪ್ ಸಯನ್ಸ್ ಹೊಮ್ಮಿಸಿದೆ.

ಪಿನ್‍ಲ್ಯಾಂಡ್, ಸ್ವೀಡನ್ ಮತ್ತು ತೈವಾನ್ ನಾಡುಗಳ ಸುಮಾರು 700 ಮಂದಿ ಪಾಲ್ಗೊಂಡಿದ್ದ ಪ್ರಯೋಗದಲ್ಲಿ ಬೇರೆ ಬೇರೆ ಭಾವನೆಗಳನ್ನು ಹೊಮ್ಮಿಸುವ ಪದಗಳು, ವಿಡಿಯೋಗಳು, ಕತೆಗಳನ್ನು ಪಾಲ್ಗೊಂಡವರ ಮುಂದಿಡಲಾಯಿತು.

ಭಾವನೆಗೆ ತಕ್ಕಂತೆ ತಮ್ಮ ಮೈಯಲ್ಲಿ ಎಂತ ಬದಲಾವಣೆಗಳಾದವು, ಯಾವ-ಯಾವ ಭಾಗಗಳು ಹೆಚ್ಚು ಹುರುಪುಗೊಂಡಿರುವಂತೆ ತೋರಿದವು ಅಂತಾ ಪಾಲ್ಗೊಂಡವರಿಂದಲೇ ಅರಕೆಗಾರರು ಪಡೆದುಕೊಂಡರು. ಆಮೇಲೆ ಅವರ ನಾಡುಗಳ ನಡೆ-ನುಡಿಗಳಿಂದಾಗಿಯೇ ಬಂದಿರಬಹುದಾದ ಕೆಲವು ಹೊರತುಗಳನ್ನು (exceptions) ಅರಕೆಗಾರರು ಕೈಬಿಟ್ಟರು. ಹೀಗೆ ಭಾವನೆಗೆ ತಕ್ಕಂತೆ ಮಾರ್ಪಡುವ  ಮೈಗನ್ನಡಿಯ ಒಟ್ಟು ನೋಟವನ್ನು ಅಣಿಗೊಳಿಸಲಾಯಿತು.

Body_Emotions

(ಭಾವನೆ ಮತ್ತು ಮೈ  ಭಾಗಗಳ ನಂಟು ತೋರಿಸುತ್ತಿರುವ ತಿಟ್ಟ. ಎಲ್ಲಕ್ಕಿಂತ ಹೆಚ್ಚು ಹುರುಪುಗೊಂಡಿರುವ ಭಾಗಗಳು ಹಳದಿ ಬಣ್ಣದಲ್ಲಿ ಮತ್ತು ಕಡಿಮೆ ಹುರುಪುಗೊಂಡಿರುವ ಭಾಗಗಳನ್ನು ನೀಲಿ ಬಣ್ಣದಲ್ಲಿ ತೋರಿಸಲಾಗಿದೆ)

ಬೇರೆ ಬೇರೆ ಭಾವನೆಗಳಿಗೆ, ಮೈಯಿಯ ಬೇರೆ ಭಾಗಗಳು ಹುರುಪುಗೊಂಡಿರುವುದು ಕಂಡಿತಾದರೂ ಕೆಲವು ಭಾವನೆಗಳಿಗೆ ಮೈಯಿಯ  ಅದೇ ಭಾಗಗಳು ಹೆಚ್ಚು ಹುರುಪುಗೊಂಡಿರುವುದು ಕಂಡಿತು. ಎತ್ತುಗೆಗೆ: ಸಿಟ್ಟು ಮತ್ತು ಅಂಜಿಕೆಗೆ ಎದೆಯ ಮೇಲ್ಭಾಗ ಹೆಚ್ಚು ಹುರುಪುಗೊಳ್ಳುವಂತಹ ವಿಷಯ. ಹೀಗಾಗಲು ಸಿಟ್ಟು ಇಲ್ಲವೇ ಅಂಜಿಕೆಯಾದಾಗ ಉಸಿರಾಟ ಮತ್ತು ನಾಡಿ ಮಿಡಿತ ಹೆಚ್ಚಾಗುವುದು ಮುಖ್ಯ ಕಾರಣವಿರಬಹುದೆಂದು ಅರಕೆಗಾರರು ತಿಳಿಸಿದ್ದಾರೆ.

ಈ ಅರಕೆಯಲ್ಲಿ ಇನ್ನೊಂದು ಕರಾರುವಕ್ಕಾಗಿ ಕಂಡುಬಂದಿದ್ದೆಂದರೆ, ’ನಲಿವು’ ಆದಾಗ ಅಷ್ಟೇ ಇಡೀ ಮಯ್ಯಿ ಹೆಚ್ಚು ಹುರುಪುಗೊಳ್ಳುತ್ತದೆ. ಗೊತ್ತಾಯಿತಲ್ಲ, ನಲಿವಿನ ’ಹುರುಪು’ ಎಂತದು ಅಂತಾ 🙂.

ತಿಳಿವಿನ ಮತ್ತು ತಿಟ್ಟಸೆಲೆ: discovermagazine)

ಇವಿ ಕೊಳ್ಳುವಿಕೆಯ ಸಮಸ್ಯೆ ಮತ್ತು ಪರಿಹಾರ (1ನೇ ಕಂತು)

  By

– ಜಯತೀರ್ಥ ನಾಡಗೌಡ. 

ಕಳೆದ ಕೆಲವು ವರುಶಗಳಿಂದ ಇಲೆಕ್ಟ್ರಿಕ್ ಗಾಡಿಗಳು ಸಾಲುಸಾಲಾಗಿ ಮಾರುಕಟ್ಟೆಗೆ ಲಗ್ಗೆ ಇಡುತ್ತಿವೆ. ಹೆಚ್ಚಿನ ಹರವು(Range), ಕಡಿಮೆ ಸಮಯದಲ್ಲಿ 80% ಚಾರ್ಜ್ ಆಗಬಲ್ಲ ಬೇರೆ ಬೇರೆ ಗಾಡಿಗಳು ಬಂದರೂ, ಕೊಳ್ಳುಗರ ಪ್ರಮಾಣದಲ್ಲಿ ಕೊಂಚ ಏರಿಕೆ ಕಂಡದ್ದು ಬಿಟ್ಟರೆ, ಇವಿಯೆಂದರೆ ಮೂಗು ಮುರಿಯುವವರ ಸಂಖ್ಯೆ ಇನ್ನೂ ಕಡಿಮೆಯಾಗಿಲ್ಲ. ಇಲೆಕ್ಟ್ರಿಕ್ ವೆಹಿಕಲ್‌ಗಳ ಕುರಿತಾದ ಕೆಲವು ಸುಳ್ಳು ಸುದ್ದಿಗಳು, ಗಾಳಿ ಸುದ್ದಿಗಳು ಜನರಲ್ಲಿ ಅರಿವಿನ ಕೊರತೆ ಮೂಡಿಸಿ ಕೊಳ್ಳುಗರನ್ನು ಅನುಮಾನ ಹೆಚ್ಚಿಸಿ ಗೊಂದಲದಲ್ಲಿರಿಸಿವೆ. ಸರಕಾರ ಇಲೆಕ್ಟ್ರಿಕ್ ಬಂಡಿ ತಯಾರಕರಿಗೆ ಮತ್ತು ಕೊಳ್ಳುಗರಿಗೆ ಹಲವು ಕೊಡುಗೆ ನೀಡಿದರೂ, ಇವಿ ಕೊಳ್ಳುಗರ ಸಂಖ್ಯೆ ಹೇಳಿಕೊಳ್ಳುವ ಮಟ್ಟಿಗೆ ಏರಿಕೆ ಕಂಡಿಲ್ಲ. ಈ ಎಲ್ಲ ಅಂತೆಕಂತೆಗಳ ಬಗ್ಗೆ ವೈಜ್ಞಾನಿಕವಾಗಿ ಬೆಳಕು ಹರಿಸಿ ನೋಡೋಣ.

ಹರವಿನ ದುಗುಡ(Range Anxiety): ಇಲೆಕ್ಟ್ರಿಕ್ ವೆಹಿಕಲ್ ಕೊಳ್ಳುವಿಕೆಗೆ ಹಿಂದೇಟು ಹಾಕುತ್ತಿರುವುದರ ಮೊದಲ ಕಾರಣ ರೇಂಜ್ ಆಂಕ್ಷೈಟಿ ಅಂದರೆ ಹರವಿನ ದುಗುಡ. ಹರವಿನ ದುಗುಡವೆಂದರೆ, ಮುಂದಿನ ಚಾರ್ಜಿಂಗ್ ತಾಣ ಸಿಗುವ ಮೊದಲೇ ಗಾಡಿಯ ಚಾರ್ಜಿಂಗ್ ಎಲ್ಲಿ ಖಾಲಿಯಾಗಿ ಬಿಡುತ್ತೋ ಪಯಣದ ನಡು ದಾರಿಯಲ್ಲಿಯೇ ಚಾರ್ಜಿಂಗ್ ಖಾಲಿಯಾದರೆ ಹೇಗೆ ಎಂದು ಕಾಡುವ ಭಯ. ಇಲೆಕ್ಟ್ರಿಕ್ ಕಾರು ಓಡಿಸುಗರಿಗೆ, ಕಾರು ಕೊಂಡವರ ಹರವಿನ ದುಗುಡ, ಈ ಅಳಲು ಇನ್ನೂ ಇದ್ದೇ ಇದೆ. ಗಾಡಿಗೆ ಹತ್ತಿರದ ಹುರುಪು ತುಂಬುವ ತಾಣಗಳ(Charging station) ಮಾಹಿತಿ ನೀಡುವ ಸಾಕಷ್ಟು ಆಪ್‌ಗಳು ಬಂದರೂ ನಿಖರವಾದ ಮಾಹಿತಿಯ ಕೊರತೆ ನೀಗುವಲ್ಲಿ ಇವುಗಳಿಂದ ಸಾಧ್ಯವಾಗಿಲ್ಲ ಎಂಬುದು ಸತ್ಯ. ಇದೇ ವಿಷಯವಾಗಿ ಎರಡನೇ ಪ್ರಮುಖ ಅಂಶವೆಂದರೆ, ದೇಶದ ಉದ್ದಗಲಕ್ಕೂ ಸಾಕಷ್ಟು ಚಾರ್ಜಿಂಗ್ ತಾಣಗಳನ್ನು ಬೆಳೆಸಿರುವ ಕಂಪನಿಗಳು ಆ ಚಾರ್ಜಿಂಗ್ ತಾಣಗಳ ನಿರ್ವಹಣೆಯನ್ನು ಸರಿಯಾಗಿ ಮಾಡುತ್ತಿಲ್ಲ. ಕಾಲ ಕಾಲಕ್ಕೆ ಅವುಗಳು ಸರಿಯಾಗಿ ಕೆಲಸ ಮಾಡುತ್ತಿವೆಯೇ ಎಂಬುದರ ಬಗ್ಗೆ ನೋಡಿ, ಸರಿಪಡಿಸುತ್ತಿಲ್ಲ. ಅದೇ ರೀತಿ ಈ ಚಾರ್ಜಿಂಗ್ ತಾಣಗಳು ಕೆಲಸ ಮಾಡುತ್ತಿವೆಯೇ ಇಲ್ಲವೇ ಎಂಬುದರ ಬಗ್ಗೆ ಈ ಮೇಲೆ ತಿಳಿಸಿದ ಆಪ್‌ಗಳಲ್ಲೂ ನಿಖರವಾದ ಮಾಹಿತಿ ಇರುವುದಿಲ್ಲ.

ಹಲವು ಮಾದರಿಗಳ ಕೊರತೆ: ಇವಿಗಳಲ್ಲಿ ಆಯ್ಕೆ ಕಡಿಮೆ. ಡೀಸೆಲ್, ಪೆಟ್ರೋಲ್ ಗಾಡಿಗಳಲ್ಲಿ ಚಿಕ್ಕ ಗಾಡಿಯಿಂದ ಹಿಡಿದು ಎಸ್‌ಯುವಿವರೆಗೂ ಹಲವು ಆಯ್ಕೆಗಳಿವೆ. ಟಾಟಾ, ಮಹೀಂದ್ರ, ಎಮ್‌ಜಿ, ಮುಂತಾದ ಕಾರು ತಯಾರಕರು ಹೊಸ ಇವಿಗಳನ್ನು ಮಾರುಕಟ್ಟೆಗೆ ತಂದರೂ, ಸುಜುಕಿ, ಹ್ಯುಂಡಾಯ್, ಟೊಯೊಟಾ, ಹೋಂಡಾ ರವರು ಇನ್ನೂ ತಮ್ಮ ಇವಿಗಳನ್ನು ಹೊರತಂದಿಲ್ಲ. ಇದರಿಂದ ಕೊಳ್ಳುಗರಿಗೆ ಆಯ್ಕೆಗಳು ಮಿತಿಯಲ್ಲಿವೆ.

ಚಾರ್ಜಿಂಗ್ ತಾಣಗಳ ಕೊರತೆ: ಬೆಂಗಳೂರು, ಬೊಂಬಾಯಿ, ದೆಹಲಿ ಮುಂತಾದ ದೊಡ್ಡ ನಗರಗಳಲ್ಲಿ ಚಾರ್ಜಿಂಗ್ ತಾಣಗಳು ಹೆಚ್ಚಿನ ಸಂಖ್ಯೆಯಲ್ಲಿದ್ದರೂ, ಎರಡನೇ ಹಾಗೂ ಮೂರನೇ ಮಟ್ಟದ ಜಿಲ್ಲಾ, ತಾಲೂಕು ಕೇಂದ್ರಗಳಲ್ಲಿ ಹುರುಪು ತುಂಬುವ ತಾಣಗಳು ಇನ್ನೂ ಬೆರಳೆಣಿಕೆಯಷ್ಟಿವೆ. ಈ ಸೌಕರ್ಯದ ಕೊರತೆಯಿಂದ ಇವಿ ಕೊಳ್ಳುಗರು ಮನಸು ಬದಲಿಸಿ ಪೆಟ್ರೋಲ್/ಡೀಸೇಲ್ ಗಾಡಿಗಳ ಮೊರೆಹೋಗುತ್ತಿದ್ದಾರೆ.

ಬೆಲೆಯ ಸಮಸ್ಯೆ: ಎಷ್ಟೇ ಹೊಸ ಕಾರುಗಳು ಮಾರುಕಟ್ಟೆಗೆ ಬಂದರೂ, ಇವಿಗಳ ಬೆಲೆ ಪೆಟ್ರೋಲ್/ಡೀಸೇಲ್ ಕಾರುಗಳಿಗಿಂತ ತುಸು ಹೆಚ್ಚು. ಇದು ಇವಿ ಕೊಳ್ಳುಗರ ಮತ್ತೊಂದು ದೂರು. ಭಾರತದಲ್ಲಿ ಹಲವಾರು ಕಾರು ಕೊಳ್ಳುಗರು ಕಾರಿನ ಬೆಲೆ ನೋಡಿ ಕೊಳ್ಳುವ ನಿರ್ಧಾರ ಮಾಡುವುದುಂಟು. ಇವಿ ಮತ್ತು ಪೆಟ್ರೋಲ್/ಡೀಸೇಲ್ ಕಾರುಗಳ ನಡುವಿರುವ ಬೆಲೆ ವ್ಯತ್ಯಾಸ, ಇವಿ ಕೊಳ್ಳುವಿಕೆಯಿಂದ ದೂರವಿರಿಸಿದೆ.

ಚಾರ್ಜಿಂಗ್ ಹಾಕದಂತಿರುವ ಅಡೆತಡೆ: ಹಲವು ನಗರ ಪ್ರದೇಶಗಳಲ್ಲಿ ಬಹುಮಹಡಿ ಕಟ್ಟಡ, ವಸತಿ ವಠಾರಗಳಲ್ಲಿ ಇವಿಗಳನ್ನು ಚಾರ್ಜಿಂಗ್ ಹಾಕಲು ಬಿಡುತ್ತಿಲ್ಲ. ಬೆಂಕಿ ಅವಘಡ, ಶಾರ್ಟ್ ಸರ್ಕ್ಯೂಟ್ ಮುಂತಾದ ಸಮಸ್ಯೆಗಳ ಕಾರಣವೊಡ್ಡಿ ನಗರಗಳ ಬಹುಮಹಡಿ ಕಟ್ಟಡ, ಕಚೇರಿಗಳಲ್ಲಿ ಚಾರ್ಜಿಂಗ್ ಹಾಕಲು ಅನುಮತಿ ನೀಡದ ಕಾರಣ, ಜನ ತಮ್ಮ ಇವಿಗಳನ್ನು ಚಾರ್ಜಿಂಗ್ ಸ್ಟೇಶನ್‌ಗಳಲ್ಲಿ ನಿಲ್ಲಿಸುವ ಪರಿಸ್ತಿತಿ ಇದೆ. ಇದಕ್ಕೆ ಬೇಸತ್ತು ,ಕೆಲವರು ಇವಿಗಳನ್ನು ಕೊಳ್ಳದೇ ಇರುವುದು ವಾಸಿ ಎನ್ನುವ ನಿರ್ಧಾರಕ್ಕೆ ಬಂದಿದ್ದಾರೆ.

ಹರವಿನ ವ್ಯತ್ಯಾಸ: ಕಾರು ತಯಾರಕರು ನೀಡುವ ಹರವಿಗೂ , ನಿಜವಾಗಿ ಓಡಿಸಿದಾಗ ಕಂಡುಬರುವ ಹರವಿಗೂ ಬಹಳ ದೊಡ್ಡ ಅಂತರ ಕಂಡುಬರುತ್ತಿದೆ. ಕೆಲವು ಕಾರು ತಯಾರಕರು 300-320ಕಿಮೀ ಹರವು ಎಂದು ಹೇಳಿಕೊಂಡಿರುತ್ತಾರೆ, ತಮ್ಮ ಕಾರಿನ ಕೈಪಿಡಿಯಲ್ಲಿ ಮೂಡಿಸಿರುತ್ತಾರೆ. ಆದರೆ ಗಾಡಿಯನ್ನು ಓಡಿಸಿದಾಗ, ಹರವಿನಲ್ಲಿ 60-80 ಕಿಮೀ ಕಡಿತವಾಗಿರುವುದು ಕಂಡುಬರುತ್ತದೆ. ಇದರಿಂದ ಇವಿ ಕೊಳ್ಳಬೇಕೆಂದಿರುವ ಹಲವರಿಗೆ ಗೊಂದಲಗಳು ಮೂಡುತ್ತಿವೆ.

ಮರುಮಾರಾಟದ ಬೆಲೆ: ಬೆಲೆಯ ವಿಷಯಕ್ಕೆ ಬಂದರೆ, ಭಾರತದಲ್ಲಿ ಹಲವರು ತಮ್ಮ ಹಳೆಯ ಕಾರುಗಳನ್ನು ಮಾರಿ ಹೊಸ ಕಾರುಗಳನ್ನು ಕೊಳ್ಳುವ ವಾಡಿಕೆಯವರು. ಆಗ ಇಂತಹ ಕೊಳ್ಳುಗರು ತಾವು ಕೊಂಡ ಕಾರು ಮುಂದಿನ ಕೆಲವು ವರ್ಷಗಳಲ್ಲಿ ಮಾರಬೇಕಾಗಿ ಬಂದಾಗ, ಮರುಮಾರಾಟಕ್ಕೆ ಎಷ್ಟು ಬೆಲೆ ಬರಬಹುದೆಂದು ಲೆಕ್ಕಾಚಾರ ಮಾಡಿಯೇ ಹೊಸ ಗಾಡಿ ಕೊಳ್ಳುವ ತೀರ್ಮಾನ ಮಾಡಿರುತ್ತಾರೆ.ಇವಿ ವಿಷಯದಲ್ಲಿ, ಮರುಮಾರಾಟದ ಬೆಲೆ ಹೆಚ್ಚು ಹೇಳಿಕೊಳ್ಳುವಂತಿಲ್ಲ. ಇವಿ ತಯಾರಕರು, ಬ್ಯಾಟರಿಗೆ 8-10 ವರ್ಷಗಳ ವಾರಂಟಿ ನೀಡಿದರೂ ಬ್ಯಾಟರಿಗಳು ಬೇಗನೆ ಸವೆದು,ಹೆಚ್ಚು ವರ್ಷ ಬಾಳಿಕೆ ಬರುವಿದಿಲ್ಲ ಎಂಬ ತಿಳುವಳಿಕೆ ಜನರಲ್ಲಿ ಮಾಡಿದೆ. ಮುಂದೊಮ್ಮೆ ಬ್ಯಾಟರಿಯನ್ನು ಬದಲಾಯಿಸುವ ಪರಿಸ್ತಿತಿ ಬಂದರೆ, ಬ್ಯಾಟರಿ ಬದಲಾಯಿಸುವ ಬೆಲೆಯ ಹೊರೆ ಹೆಚ್ಚಲಿದೆ ಎಂದು ಮರುಮಾರಾಟಗೊಳ್ಳುವ ಇವಿಗಳಿಗೆ ಬೇಡಿಕೆ ಇಲ್ಲವೇ ಇಲ್ಲ ಎನ್ನಬಹುದು. ಬ್ಯಾಟರಿಗಳ ಕುರಿತಾಗಿ ಇನ್ನೊಂದು ಪ್ರಮುಖ ಅಂಶವೆಂದರೆ, 8-10 ವರ್ಷಗಳ ನಂತರ ಈ ಗಾಡಿಗಳ ಬ್ಯಾಟರಿಗಳನ್ನು ಬದಲಿಸಬೇಕೆ ಇಲ್ಲವೇ ಎಂಬ ಬಗ್ಗೆ ಅನುಮಾನಗಳಿವೆ. ಒಂದೊಮ್ಮೆ ಬ್ಯಾಟರಿ ಬದಲಿಸುವ ಸಂದರ್ಭ ಬಂದಾಗ ಗಾಡಿಯ 40-50% ಹಣ ಬ್ಯಾಟರಿ ಮೇಲೆ ಸುರಿಯಬೇಕು. ಇದಕ್ಕೆ ಇವಿ ಕೊಳ್ಳುವ ಮುಂಚೆ, ಖರೀದಿಸಲು ಹತ್ತಾರು ಬಾರಿ ಯೋಚನೆ ಮಾಡುವಂತಾಗಿದೆ.

ಮಾರಾಟದ ನಂತರ ನೆರವು ಮತ್ತು ಬೆಂಬಲದ ಕೊರತೆ: ಇವಿಗಳಲ್ಲಿ ಹಲವು ಹೊಸ ಕಾರುಗಳು ಬಂದರೂ, ಕಾರು ತಯಾರಕರ ಕಡೆಯಿಂದ ಮಾರಾಟದ ನಂತರ ಗುಣಮಟ್ಟದ ನೆರವು ಮತ್ತು ಬೆಂಬಲ ಸಿಗುತ್ತಿಲ್ಲ. ಕೆಲವು ಗಾಡಿಗಳ ತಯಾರಕರ ಒಳ್ಳೆಯ ನೆರವಿನ ಜಾಲವನ್ನು ಹೊಂದಿಲ್ಲ, ಒಂದು ಪಕ್ಷ ಹೊಂದಿದ್ದರೂ ಅವರಲ್ಲಿ ನುರಿತ ಸಿಬ್ಬಂದಿಯ ಕೊರತೆಯಿದೆ. ಇವಿಗಳನ್ನು ಸರ್ವೀಸ್ ಮಾಡಿ, ರೀಪೆರ್ ಮಾಡುವ ನುರಿತ ತಂತ್ರಜ್ಞರು ಸಿಗುತ್ತಿಲ್ಲ. ಇದರಿಂದ ಇವಿ ಮಾಲೀಕರು ಸರಿಯಾಗಿ ತಮ್ಮ ಕಾರುಗಳ ಸರ್ವೀಸ್ ಮಾಡುತ್ತಿಲ್ಲ, ಹಲವು ದಿನಗಳವರೆಗೂ ಕಾರು ಸರ್ವೀಸ್ ಮಾಡಿ ಮರಳಿಸುತ್ತಿಲ್ಲ ಎಂದು ಗೋಳಿಡುತ್ತಿದ್ದಾರೆ. ಇದು , ಇವಿ ಕೊಳ್ಳಬಯಸುವವರನ್ನು ಚಿಂತೆಗೀಡು ಮಾಡಿದೆ. ಇದು ಅಲ್ಲದೇ, ಕೆಲವು ಗಾಡಿ ಮಾಲೀಕರು ತಾವು ಕೊಂಡ ಗಾಡಿಗಳನ್ನು ತಮಗಿಷ್ಟದ ರೀತಿಯಾಗಿ ಚಿಕ್ಕ-ಪುಟ್ಟ ಮಾರ್ಪಾಡು ಮಾಡುವ ಹವ್ಯಾಸಿಗಳಾಗಿರುತ್ತಾರೆ. ಇಂತವರು ಒಂದು ಚಿಕ್ಕ ಪುಟ್ಟ ದೀಪದ ಬಲ್ಬ್ ಬದಲಿಸಿದರೂ, ಹೊಸದಾಗಿ ಇಲೆಕ್ಟ್ರಾನಿಕ್ ಕ್ಯಾಮೆರಾಗಳನ್ನು ಅಳವಡಿಸಿಕೊಂಡರೂ ವಾರಂಟಿ ಮೀರುತ್ತದೆಂದು ಇವಿ ತಯಾರಕರು ಕಟ್ಟಳೆ ಹೇರಿರುವುದು, ಕಿರಿಕಿರಿಯಾಗಿದೆ.

ಗಾಲಿಗಳುಳ್ಳ ಕಂಪ್ಯೂಟರ್: ಹೆಚ್ಚುತ್ತಿರುವ ತಂತ್ರಜ್ಞಾನ, ADAS ನಂತ ವಿಶೇಷತೆ ಹೆಚ್ಚಳದಿಂದ, ಟೆಕ್-ಸ್ಯಾವಿಯಿಲ್ಲದ ಜನತೆ ಇವಿಗಳನ್ನು, ಗಾಲಿಗಳನ್ನು ಹೊಂದಿರುವ ಕಂಪ್ಯೂಟರ್‌ಗಳೆಂದು ನೋಡುತ್ತಿದ್ದಾರೆ. ತಂತ್ರಜ್ಞಾನ ಅರಿವಿಲ್ಲದ ಜನತೆ ಇವಿಗಳು ನಮಗಲ್ಲ ಎನ್ನುವ ಭಾವನೆಗೆ ಬಂದಂತಿದೆ, ಇದು ಕೂಡ ಇವಿ ಕೊಳ್ಳುವಿಕೆಗೆ ಹಿನ್ನಡೆಯೊಡ್ಡಿದೆ.

ಮುಂದಿನ ಬರಹದಲ್ಲಿ ಈ ಎಲ್ಲ ಸಮಸ್ಯೆಗಳಿರುವ ಪರಿಹಾರಗಳತ್ತ ನೋಟ ಹರಿಸೋಣ.

ತಿಟ್ಟ ಸೆಲೆ: elecvulum.com

ನೆಲದಾಳದಲ್ಲಿ ಹೊಸ ನೀರು

  By , , , ,

– ಪ್ರಶಾಂತ ಸೊರಟೂರ.

ಈಗ ಕಡಲಿನಲ್ಲಿರುವ ನೀರಿಗಿಂತ ಮೂರು ಪಟ್ಟು ಹೆಚ್ಚಿನ ನೀರು ನೆಲದಾಳದಲ್ಲಿ ದೊರೆತಿದೆ !

ಎಂಬಂತ ಬಿಸಿ ಸುದ್ದಿ ಹಲವು ವರ್ಷಗಳಿಂದ ಜಗತ್ತಿನೆಲ್ಲೆಡೆ ಪಸರಿಸಿತ್ತು. ಹನಿ ನೀರಿಗಾಗಿ ಪರದಾಡುತ್ತಿರುವ ಇಂದಿನ ದಿನಗಳಲ್ಲಿ ಹೊಸದಾಗಿ ದೊರೆತ ಹೇರಳವಾದ ನೀರಿನ ಸೆಲೆ ಎಲ್ಲರನ್ನೂ ಸೆಳೆದಿತ್ತು. ಆದರೆ ಹಾಗೆ ದೊರೆತ ಸೆಲೆಯ ಆಳಕ್ಕೆ ಹೋಗುವುದು ಮತ್ತು ಅಲ್ಲಿಂದ ನೀರೆತ್ತಿ ನೆಲದ ಮೇಲ್ಗಡೆ ತರುವುದು ಈ ಹೊತ್ತಿಗಂತೂ ಆಗದ ಮಾತು ಅನ್ನುವಂತ ವಿಷಯ ಹಲವು ಮಂದಿಯ ಗಮನಕ್ಕೆ ಬರಲಿಲ್ಲವೆನ್ನಬಹುದು.

ಹೊಸ ನೀರಿನ ಸೆಲೆ ಎಟುಕದ ಕನ್ನಡಿಯಲ್ಲಿರುವ ಗಂಟಿನಂತಾದರೂ, ಈ ಹೊಸ ಕಂಡುಹಿಡಿಯುವಿಕೆ ನೆಲದಲ್ಲಿ ಕಡಲುಗಳು ಹೇಗೆ ಉಂಟಾದವು ಅನ್ನುವಂತ ಸಿಕ್ಕಲಾದ ಪ್ರಶ್ನೆಗೆ ಸರಿಯಾದ ಉತ್ತರ ನೀಡಲಿದೆಯೆಂದು ಅರಿಮೆಗಾರರು ಅಂದುಕೊಂಡಿದ್ದಾರೆ. ನೀರಿನ ಈ ಹೊಸ ಸೆಲೆಯತ್ತ ಹೋಗುವ ಮುನ್ನ ನಮ್ಮ ನೆಲದ ಆಳಕ್ಕೆ ಮೊದಲು ಇಳಿಯೋಣ ಬನ್ನಿ.

ನೆಲದ ಮೇಲ್ಮಯಲ್ಲಿ ಕಡಲು, ಬೆಟ್ಟಗಳು ಇರುವುದು ಕಣ್ಣಿಗೆ ಕಾಣಿಸುವಂತದು. ನೆಲದಲ್ಲಿ ನೀರಿನ ಪಾಲು ಮೂರುಪಟ್ಟಿದೆ ಅನ್ನುವುದು ಅದರ ಮೇಲ್ಮಯನ್ನು ತೆಗೆದುಕೊಂಡಾಗಷ್ಟೇ ದಿಟ, ಆದರೆ ಅದರ ಒಡಲಾಳದ ರಚನೆಯನ್ನು ತಿಳಿದುಕೊಂಡಾಗ ಅದರ ಇಡಿಯಾದ ಕಟ್ಟಣೆ ನಮ್ಮ ಅರಿವಿಗೆ ಬರಬಲ್ಲದು. ನೆಲದ ಒಟ್ಟಾರೆ ತೂಕಕ್ಕೆ ಹೋಲಿಸಿದಾಗ ನೀರಿನ ತೂಕ, ಅದರ ಪ್ರಮಾಣ ತುಂಬಾನೇ ಕಡಿಮೆ. ನೆಲದಾಳವು ಮುಖ್ಯವಾಗಿ ಕಬ್ಬಿಣದಂತಹ ಜಲ್ಲಿಯ ವಸ್ತುಗಳಿಂದ ಕೂಡಿದೆ.

ಹಿಂದಿನ ಬರಹವೊಂದರಲ್ಲಿ ನೆಲದ ದುಂಡಗಲವು ಸುಮಾರು 12,756 ಕಿ.ಮೀ. ಮತ್ತು ಅದರ ರಾಶಿಯು (mass) ಸುಮಾರು 5.98 x1024 kg ಇರುವುದನ್ನು ತಿಳಿದುಕೊಂಡಿದ್ದೆವು. ನೆಲದ ಮೇಲ್ಮಯಿಂದ ನೆಲದ ನಡುವು (center) ಸುಮಾರು 12,756/ = 6378 ಕಿ.ಮೀ. ಆಳದಲ್ಲಿದೆ.

ಅದರ ಒಟ್ಟು ರಾಶಿಯಲ್ಲಿ ಕಬ್ಬಿಣವು ಸುಮಾರು 32.1%, ಆಕ್ಸಿಜನ್ 30.1%, ಸಿಲಿಕಾನ್ 15.1%, ಮ್ಯಾಗ್ನೇಸಿಯಂ 13.9%, ಗಂದಕ 2.9%, ನಿಕೆಲ್ 1.8%, ಕ್ಯಾಲ್ಸಿಯಂ 1.5% ಮತ್ತು ಅಲ್ಯುಮಿನಿಯಂ 1.4% ರಷ್ಟಿದೆ. ಕೆಳಗಿನ ತಿಟ್ಟದಲ್ಲಿ ನೆಲದ ಒಟ್ಟಾರೆ ಸೀಳುನೋಟವನ್ನು ತೋರಿಸಲಾಗಿದೆ.

ನೆಲದ ಇಟ್ಟಳವನ್ನು (structure) ತೊಗಟೆ (0-35 km), ಮೇಲ್ ಹೊದಿಕೆ (35-60 km), ಹೊದಿಕೆ (35-2890 km), ಹೊರತಿರುಳು (2890-5150) ಮತ್ತು ಒಳತಿರುಳು (5150-6378 km) ಅಂತಾ ಗುರುತಿಸಲಾಗಿದೆ. ನೆಲದ ಒಳತಿರುಳು ಮತ್ತು ಹೊರತಿರುಳಿನ ಭಾಗ ತುಂಬಾ ದಟ್ಟಣೆ ಹೊಂದಿದ್ದು ಮುಖ್ಯವಾಗಿ ಕರಗಿದ ಕಬ್ಬಿಣದಿಂದ ಕೂಡಿದೆ. ಹೊದಿಕೆಯ ಭಾಗವು ಸಿಲಿಕೇಟ್ ಕಲ್ಲುಗಳಿಂದ ಕೂಡಿದ್ದು ಕಬ್ಬಿಣ ಮತ್ತು ಮ್ಯಾಗ್ನೇಸಿಯಂ ಜಲ್ಲಿಗಳನ್ನು ಒಳಗೊಂಡಿದೆ. ತೊಗಟೆಯ ಭಾಗವು ಕಡಲಾಳ, ಕಲ್ಲುಗಳು, ಜಲ್ಲಿಗಳಿಂದ ಕೂಡಿದೆ.

ನೆಲದ ಆಳದಲ್ಲಿ ತುಂಬಾನೇ ಒತ್ತಡ ಮತ್ತು ಬಿಸುಪಿರುವುದರಿಂದ ಅದರ ಆಳಕ್ಕೆ ಕೆಲವು ಕಿ.ಮೀ. ಗಳಷ್ಟೇ ಮನುಷ್ಯರು ಮಾಡಿದ ಸಲಕರಣೆಗಗಳು ಇಳಿಯಬಲ್ಲವು. ಹಾಗೆ ನೋಡಿದರೆ ಇಲ್ಲಿಯವರೆಗೆ ನೆಲದ ಮೇಲ್ಮಯಿಂದ ಮನುಷ್ಯರಿಗೆ ಕೊರೆಯಲು ಆದ ತೂತಿನ ಆಳ ಬರೀ 12.3 ಕಿ.ಮೀ. (ರಷ್ಯಾ ಕೈಗೊಂಡ ತೂತು ಕೊರೆಯುವ ಹಮ್ಮುಗೆ, 1989). ನೆಲದಾಳದಲ್ಲಿ ಸಲಕರಣೆಗಳನ್ನು ಇಳಿಸಲು ಆಗದಿದ್ದರೂ, ನೆಲದ ಇಟ್ಟಳವನ್ನು ಅರಿಮೆಯ ಇತರ ಚಳಕಗಳನ್ನು ಬಳಸಿ ಅರಿತುಕೊಳ್ಳಲಾಗುತ್ತದೆ. ಅಂತಹ ಅರಿಮೆಯ ಚಳಕದಲ್ಲಿ ಮುಕ್ಯವಾದದ್ದು ನಡುಕದರಿಮೆ (Seismology).

ಮುಖ್ಯವಾಗಿ ನೆಲದ ತೊಗಟೆಯ ಭಾಗದಲ್ಲಿ ಬಿಡುಗಡೆಯಾಗುವ ಹೇರಳವಾದ ಕಸುವಿನಿಂದಾಗಿ ‘ನೆಲನಡುಕಗಳು’ (earthquakes) ಉಂಟಾಗುತ್ತವೆ. ಹೀಗೆ ಉಂಟಾದ ನೆಲನಡುಕಗಳು ಹೊಮ್ಮಿಸುವ ನಡುಕದ ಅಲೆಗಳು (seismic waves), ನೆಲದ ಮೇಲ್ಮಯಿಂದ ಹಿಡಿದು ಅದರ ತಿರುಳಿನ ಭಾಗದವರೆಗೆ ತೂರಬಲ್ಲವು. ನಡುಕದ ಅಲೆಗಳ ಹರಡುವ ಬಗೆ, ಅವುಗಳ ವೇಗ, ನೆಲದ ಇಟ್ಟಳವನ್ನು ಮೇಲೆ ತಿಳಿಸಿರುವಂತೆ ಗುರುತಿಸಲು ನೆರವಾಗಿವೆ. ನಡುಕದ ಅಲೆಗಳು ಬೇರೆ ಬೇರೆ ವಸ್ತುಗಳಲ್ಲಿ ಬೇರೆಯಾದ ವೇಗದಿಂದ ಹರಡುತ್ತವೆ. ಒಣಕಲ್ಲಿನಂತಹ ರಚನೆಯಲ್ಲಿ ಅವುಗಳ ವೇಗ ಬೇರೆಯಾಗಿದ್ದರೆ ನೀರಿನಿಂದ ಕೂಡಿದ ಹಸಿಕಲ್ಲಿನಲ್ಲಿ ವೇಗವು ಬೇರೆಯಾಗಿರುತ್ತದೆ.

ಮುಮ್ಮಲೆಗಳು (Primary/P Waves) ಎಂದು ಗುರುತಿಸಲಾಗುವ ನಡುಕದಲೆಗಳ ಒಂದು ಬಗೆ, ಗಟ್ಟಿಯಾದ ಮತ್ತು ನೀರಿನ ರೂಪದಲ್ಲಿರುವ ವಸ್ತಗಳೆರಡಲ್ಲೂ ಸಾಗಬಲ್ಲವು. ಅದೇ ಇಮ್ಮಲೆಗಳು (Secondary/S Waves) ಎಂಬ ನಡುಕದಲೆಗಳು ಗಟ್ಟಿಯಾದ ವಸ್ತುಗಳಲ್ಲಷ್ಟೇ ಸಾಗಬಲ್ಲವು.

Picture1

ಹಾಗೆನೇ ನೀರಿನ ರೂಪ ಇಲ್ಲವೇ ಅದರ ಅಂಶವನ್ನು ಹೊಂದಿದ ವಸ್ತುಗಳಲ್ಲಿ ಸಾಗುವಾಗ ಮುಮ್ಮಲೆಗಳ ವೇಗ ಬದಲಾಗುವುದು ಅರಕೆಯಿಂದ ತಿಳಿದುಬಂದಿದೆ. ಈ ಅರಿವನ್ನು ಬಳಸಿಕೊಂಡೇ ಇತ್ತೀಚಿಗೆ ನೆಲದಾಳದಲ್ಲಿ ’ನೀರಿದೆ’ ಎಂಬುದನ್ನು ಅಂದಾಜಿಸಲಾಗಿದೆ. ಈಗ ನಮ್ಮ ಈ ಬರಹದ ಮುಖ್ಯ  ವಿಷಯ’ನೆಲದಾಳ’ದಲ್ಲಿ ನೀರಿನತ್ತ ಬಂದಂತಾಯಿತು.

ಅಮೇರಿಕಾದ ನಾರ್ತ್ ವೆಸ್ಟರ್ನ್ ಯೂನಿವರ್ಸಿಟಿಯ ನೆಲದಿರುವರಿಗ (geophysicist) ಸ್ಟೀವ್ ಜಾಕಬ್ಸನ್ (Steve Jacobsen) ಮತ್ತು ನ್ಯೂ ಮೆಕ್ಸಿಕೋ ಯೂನಿವರ್ಸಿಟಿಯ ನಡುಕದಲೆಯರಿಗ (seismologist) ಬ್ರಾಂಡನ್ (Brandon Schmandt) ಅವರು ನಡುಕದರಿಮೆ ಬಳಸಿ, ನೆಲದ ಮೇಲ್ಮೈಯಿಂದ ಸುಮಾರು 660 ಕಿ.ಮೀ. ಆಳದಲ್ಲಿ ನೀರಿನ ಬಿಡಿಕಣಗಳಿದ್ದು, ಅವುಗಳು ರಿಂಗ್‍ವುಡಯ್ಟ್ (Ringwoodite) ಎಂಬ ಹರಳು ರೂಪದಲ್ಲಿರುವ ವಸ್ತುವಿಗೆ ಅಂಟಿಕೊಂಡಿರುವುದಾಗಿ ತಿಳಿಸಿದ್ದಾರೆ.

ರಿಂಗ್‍ವುಡಯ್ಟ್ (ಅದನ್ನು ಕಂಡುಹಿಡಿದ ಅರಿಮೆಗಾರರ ಹೆಸರಿನಿಂದ ಕರೆಯಲಾಗುತ್ತಿದೆ), ನೆಲದಾಳದ ಹೊದಿಕೆಯ ಭಾಗದಲ್ಲಿ ಹೇರಳವಾಗಿ ಇರುವ ವಸ್ತುವೆಂದು ನಡುಕದಲೆಗಳ ಮೂಲಕ ಈ ಮುಂಚೆ ಅರಿಯಲಾಗಿತ್ತು. ರಿಂಗ್‍ವುಡಯ್ಟ್ ಮುಖ್ಯವಾಗಿ  ಕಬ್ಬಿಣ ಮತ್ತು ಮ್ಯಾಗ್ನೇಸಿಯ್ಂ ನಿಂದ ಕೂಡಿದ್ದು, ತನ್ನ ತೂಕದ 2.1% ರಷ್ಟು ನೀರನ್ನು ಹಿಡಿದುಕೊಳ್ಳಬಲ್ಲದು ಅಂತಾನೂ ತಿಳಿಯಲಾಗಿತ್ತು. ಆದರೆ ಇಲ್ಲಿಯವರೆಗೆ ನೆಲದಾಳದ ರಿಂಗ್‍ವುಡಯ್ಟ್ ಹರಳಿನಲ್ಲಿ ನಿಜವಾಗಲೂ ನೀರಿದೆಯೇ ಎಂದು ಗೊತ್ತಾಗಿರಲಿಲ್ಲ.

BlueRingwoodite

(ನೆಲದ ಒಡಲಾಳದ ಹೊದಿಕೆಯ ಭಾಗದಲ್ಲಿ ಕಂಡುಬರುವ ರಿಂಗ್‍ವುಡಯ್ಟ್ ಹರಳು)

ಇಲ್ಲಿಯವರೆಗೆ ಉಂಟಾದ ಸುಮಾರು 500 ನೆಲನಡುಕಗಳ (earthquakes) ಮಾಹಿತಿಗಳನ್ನು ಸ್ಟೀವ್ ಜಾಕಬ್ಸನ್ ಅವರು ಒರೆಗೆಹಚ್ಚಿ ನೋಡಿದಾಗ, ನಡುಕದಲೆಗಳ (seismic waves) ವೇಗ ಸುಮಾರು 660 ಕಿ.ಮೀ. ನೆಲದಾಳಕ್ಕೆ ತಲುಪಿದಾಗಲೆಲ್ಲಾ ಬೇರೆಯಾಗಿರುವುದು ಮತ್ತು ಆ ವೇಗ ಹಸಿ ರೂಪದಲ್ಲಿರುವ ರಿಂಗ್‍ವುಡಯ್ಟ್ ಹರಳುಗಳಿಗೆ ತಾಗಿದಾಗ ಪಡೆಯುವ ವೇಗಕ್ಕೆ ಸಾಟಿಯಾಗಿದೆ ಎಂದು ತೋರಿಸಿದ್ದಾರೆ. ಇದಕ್ಕಾಗಿ ಅವರು ಮತ್ತು ಬ್ರಾಂಡನ್ ತಮ್ಮ ಅರಕೆಮನೆಯಲ್ಲಿ ಹಸಿ ಮತ್ತು ಒಣ ರಿಂಗ್‍ವುಡಯ್ಟ್ ಹರಳುಗಳಿಗೆ ನಡುಕದಲೆಗಳನ್ನು ತಾಗಿಸಿದಾಗ ದೊರೆತ ವೇಗ ಮತ್ತು ನೆಲನಡುಕಗಳು ನೀಡಿದ ಮಾಹಿತಿಯನ್ನು ತಾಳೆಹಾಕಿ ಈ ನಿಲುವಿಗೆ ಬಂದಿದ್ದಾರೆ.

ಹೀಗೆ ನೆಲದಾಳದಲ್ಲಿ ಇಳಿಯದೇ ಅರಿಮೆಯ ಚಳಕಗಳನ್ನು ಬಳಸಿ ನೆಲದ ಒಡಲಾಳದಲ್ಲಿ ನೀರಿರುವುದನ್ನು ಅರಿಮೆಗಾರರು ತೋರಿಸಿದಂತಾಗಿದೆ. ನಮಗೆ ಕಂಡಿರುವ ಈ ಹೊಸ ನೀರು ಬಳಕೆಗೆ ಎಟುಕದಂತಿದ್ದರೂ, ನಮ್ಮ ನೆಲದ ಮೇಲ್ಮೈಯಲ್ಲಿ ಉಂಟಾಗಿರುವ ಕಡಲುಗಳ ಹುಟ್ಟಿನ ಕತೆ ಮತ್ತು ಒಟ್ಟಾರೆಯಾಗಿ ನೆಲದ ರಚನೆಯ ಬಗ್ಗೆ ನಮಗೆ ಸಾಕಷ್ಟು ತಿಳುವಳಿಕೆಯನ್ನು ಮುಂದಿನ ದಿನಗಳಲ್ಲಿ ನೀಡಲಿದೆ.

(ಮಾಹಿತಿ ಮತ್ತು ತಿಟ್ಟ ಸೆಲೆಗಳು: www.usatoday.com, scitechdaily.com, wikipedia.org)

E20 ವರವೋ ಇಲ್ಲ ಶಾಪವೋ?

  By ,

– ಜಯತೀರ್ಥ ನಾಡಗೌಡ. 

E20 ವಿಚಾರಗಳು ಎಲ್ಲೆಡೆ ಮಾತುಕತೆಯ ವಿಷಯವಾಗಿದೆ. ಫೇಸ್‍ಬುಕ್, ಎಕ್ಸ್, ಲಿಂಕ್ಡ್‌ಇನ್ ನಂತಹ ಸಾಮಾಜಿಕ ಜಾಲತಾಣಗಳಿಂದ ಹಿಡಿದು ರಾಜಕೀಯವಲಯಗಳಲ್ಲೂ ಇದೇ ಪ್ರಮುಖ ವಿಷಯ. ಈ ಹೊತ್ತಿನ ವಿಷಯ ವಸ್ತುವಾಗಿರುವ E20 ಬಗ್ಗೆ ತಿಳಿಯೋಣ ಬನ್ನಿ.

ಏನಿದು E20?

ಇಥೆನಾಲ್‌ನ 20% ಪ್ರಮಾಣದಲ್ಲಿ ಪೆಟ್ರೋಲ್ ಉರುವಲಿನೊಂದಿಗೆ ಬೆರೆಸಿದರೆ ಅದೇ E20. ವಾಹನಗಳಲ್ಲಿ E20 ಬಳಸಿದರೆ ಕಾರ್ಬನ್ ನಂತ ನಂಜಿನ ಹೊಗೆಯ ಪ್ರಮಾಣ ಕಡಿಮೆ ಮಾಡಿ, ಮುಗಿದುಹೋಗಬಲ್ಲ ಉರುವಲಾದ ಪೆಟ್ರೋಲ್ ಮೇಲಿನ ಅವಲಂಬನೆ ಕಡಿತಗೊಳಿಸಬಹುದು.

ಇಥೈಲ್ ಆಲ್ಕೋಹಾಲ್‍ನ ಕಿರಿದಾಗಿಸಿ ಇಥೆನಾಲ್ ಎಂದು ಕರೆಯುತ್ತಾರೆ. ಇಥೆನಾಲ್ ಒಂದು ನೀರಿನಂತೆ ತಿಳಿಯಾಗಿರುವ (ಯಾವುದೇ ಬಣ್ಣವಿರುವುದಿಲ್ಲ), ತನ್ನದೇ ವಿಶೇಷ ವಾಸನೆ ಮತ್ತು ರುಚಿ ಹೊಂದಿರುತ್ತದೆ. ಚೊಕ್ಕವಾಗಿರುವ ಇಥೆನಾಲ್ ವಿಷಕಾರಿಯಲ್ಲ ಹಾಗೂ ಜೈವಿಕ ಸರಪಣಿಯಲ್ಲಿ ಸುಲಭವಾಗಿ ಒಡೆದು ಸೇರಿಹೋಗಬಲ್ಲ (Biodegradable) ರಾಸಾಯನಿಕ. ರಾಸಾಯನಿಕವಾಗಿ ಇದನ್ನು C2H5OH ಎಂದು ಬರೆಯಬಹುದು. ಇದರಲ್ಲಿ ಕಾರ್ಬನ್, ಹೈಡ್ರೋಜನ್ ಮತ್ತು ಆಕ್ಸಿಜನ್ ಅಣುಗಳು ಸೇರಿರುತ್ತವೆ. ಇಥೆನಾಲ್ ವಾತಾವರಣದಲ್ಲಿ ಸೋರಿಕೆಯಾದರೆ ಯಾವುದೇ ಅಪಾಯವೂ ಇರುವುದಿಲ್ಲ. ಆದರೆ ಉರುವಲಿನ ರೂಪದಲ್ಲಿರುವ ಇಥೆನಾಲ್‍ಗೆ ಡಿನಾಚ್ಯುರಂಟ್‌(Denaturant) ರಾಸಾಯನಿಕ ಸೇರಿಸುತ್ತಾರೆ, ಆದುದ್ದರಿಂದ ಇದು ಕುಡಿಯಲು ತಕ್ಕುದಲ್ಲ.

E20 ತಯಾರಿಸುವ ಬಗೆ:

ಸ್ಟಾರ್ಚ್ ಮತ್ತು ಸಕ್ಕರೆ ಪ್ರಮಾಣ ಹೊಂದಿರುವ ಕಬ್ಬು, ಮೆಕ್ಕೆಜೋಳ, ಗೋಧಿ, ಬಾರ್ಲಿ ಮುಂತಾದ ಬೆಳೆಗಳಿಂದ ಇಥೆನಾಲ್ ಪಡೆಯಬಹುದು. ಬೆಳೆಗಳನ್ನು ಹುದುಗೆಬ್ಬಿಸುವ(Fermentation) ಮೂಲಕ ಇಥೆನಾಲ್ ಪಡೆಯಬಹುದು. ದನಕರು, ಆಡು ಮೇಕೆ ಮುಂತಾದ ಸಾಕುಪ್ರಾಣಿಗಳಿಗೆ ನೀಡಲಾಗುವ ಬಾರ್ಲಿಯಂತ ಬೇಳೆಕಾಳುಗಳಿಗೆ ಯೀಸ್ಟ್, ಬ್ಯಾಕ್ಟೇರಿಯಾಗಳನ್ನು ಸೇರಿಸಿದಾಗ ಅವುಗಳಿಂದ ಹೆಚ್ಚಿನ ಪ್ರಮಾಣದ ಸಕ್ಕರೆ, ಸ್ಟಾರ್ಚ್ ಕೊಬ್ಬನ್ನು ಪಡೆಯಬಹುದು ಇದರಿಂದಲೇ ಇಥೆನಾಲ್ ಪ್ರಮಾಣ ಹೆಚ್ಚಿಸಬಹುದು. ಹೀಗೆ ಹುದುಗೆಬ್ಬಿಸುವಿಕೆಯಿಂದ ಪಡೆದಂತಹ ಇಥೆನಾಲ್ ಜೊತೆಗೆ ನೀರು, ಇತರೆ ವಸ್ತುಗಳು ಸೇರಿರುತ್ತವೆ. ಇವುಗಳಿಂದ ಇಥೆನಾಲ್‌ಅನ್ನು ವಿಂಗಡಿಸಲು ಬಟ್ಟಿ ಇಳಿಸುವಿಕೆ(Distillation) ಮಾಡಲಾಗುತ್ತದೆ. ಇದರಿಂದಲೂ ಚೊಕ್ಕ ಇಥೆನಾಲ್ ಸಿಗದೇ ಇದ್ದಾಗ ನೀರಿಳಿತ(Dehydration) ಮಾಡಿ ಇಥೆನಾಲ್ ಅನ್ನು ಹೊರತೆಗೆಯಲಾಗುತ್ತದೆ. ಈ ರೀತಿ ಸಿಗುವ ಇಥೆನಾಲ್‌ಗೆ ಪೆಟ್ರೋಲ್ ಉರುವಲನ್ನು ಅಳತೆಗೆ ತಕ್ಕಂತೆ ಅಂದರೆ E10,E15 ಮತ್ತು E20 ಮಿಶ್ರಣ ಬೆರೆಸಿ ಉರುವಲನ್ನು ಬಳಕೆಗೆ ತಕ್ಕುದಾಗಿರುವಂತೆ ಮಾಡುತ್ತಾರೆ. 

E20 ವರವೋ ಇಲ್ಲ ಶಾಪವೋ?

ಈ20 ಪೆಟ್ರೋಲ್‌ದಿಂದ ಅನುಕೂಲವೋ ಇಲ್ಲವೇ ಅನಾನುಕೂಲವೋ ಎಂಬುದು ಹಲವರಿಗೆ ಪ್ರಶ್ನೆಯಾಗಿಯೇ ಉಳಿದಿದೆ. ಹಲವಾರು ಗಾಡಿ ಓಡಿಸುಗರು, ಮಾಲೀಕರು ಈ20 ಪೆಟ್ರೋಲ್ ಬಳಸಬೇಕೆ ಇಲ್ಲವೇ ಎಂಬ ಗೊಂದಲದಲ್ಲಿದ್ದಾರೆ. ಈ20 ಉರುವಲು ಬಳಸಿ ಓಡಾಡುತ್ತಿರುವ ಹಲವು ಕಾರುಗಳ ಮಾಲೀಕರು ಕಡಿಮೆ ಮೈಲಿಯೋಟ, ಬಿಣಿಗೆಯ(Engine) ಬಾಳಿಕೆ-ತಾಳಿಕೆ ಕುರಿತು ಅಸಮಾಧಾನವನ್ನು ಹೊರಹಾಕಿದ್ದಾರೆ. ಇದನ್ನು ಕೊಂಚ ಆಳಕ್ಕಿಳಿದು ನೋಡೋಣ.

ಏಪ್ರಿಲ್ 2023ರಲ್ಲಿ ಭಾರತದ ಆಯ್ದ ನಗರಗಳಲ್ಲಿ ಈ20 ಉರುವಲಿನ ಬಳಕೆಗೆ, ಭಾರತ ಸರಕಾರ ಶುರುಮಾಡಿತ್ತು. ಭಾರತದೆಲ್ಲೆಡೆ ಇದೇ ವರ್ಷದ ಏಪ್ರಿಲ್ ನಿಂದ ಈ20 ಉರುವಲಿನ ಬಳಕೆಯನ್ನು ಕಡ್ಡಾಯಗೊಳಿಸಲಾಗಿತ್ತು. ಬೇಗನೇ ಈ20 ಬಳಕೆಯನ್ನು ಅಳವಡಿಸಿಕೊಳ್ಳಲು ಮೊದ-ಮೊದಲು ವಾಹನ ಮತ್ತು ಬಿಡಿಭಾಗಗಳ ತಯಾರಕರು ಹಿಂದೇಟುಹಾಕಿದ್ದರು. ಕಾರಣ, ಕಡಿಮೆ ಹೊತ್ತಿನಲ್ಲಿ ಬಿಣಿಗೆ ಮತ್ತು ವಾಹನಗಳನ್ನು ಓರೆಗೆ ಹಚ್ಚಿ, ಬಿಡಿಭಾಗಗಳನ್ನು ಪರೀಕ್ಷಿಸಿ ಅವುಗಳ ತಾಳಿಕೆ ಬಾಳಿಕೆಯ ಬಗ್ಗೆ ಮಾಹಿತಿ ಕಲೆಹಾಕಲಾಗದೆಂದು ಒತ್ತಾಯಿಸಿದ್ದರು.

ಪೆಟ್ರೋಲ್‍ನೊಂದಿಗೆ ಇಥೆನಾಲ್ ಬೆರಸಿದಾಗ ಅಂದರೆ ಈ20 ಯಿಂದಾಗುವ ಅನುಕೂಲಗಳು:

  1. ಹೇರಳವಾದ ಆಕ್ಸಿಜನ್ ಹೊಂದಿರುವ ಇಥೆನಾಲ್ ಮಿಶ್ರಣ ಹೆಚ್ಚಿನ ಆಕ್ಟೇನ್ ನಂಬರ್ (Octane Number-RON) ಪಡೆದಿದೆ. ಇದರಿಂದ ಬಿಣಿಗೆಯೊಳಗೆ ಉರುವಲು ಚೆನ್ನಾಗಿ ಉರಿದು ಕಡಿಮೆ ಕಾರ್ಬನ್, ಇತರೆ ಹೊಗೆ ಹೊರಸೂಸುತ್ತದೆ. ಇದು ಪರಿಸರ ಹೆಚ್ಚು ಹಸನಾಗಿಡುತ್ತದೆ.
  2. ಹೆಚ್ಚಿನ ಆಕ್ಟೇನ್ ನಂಬರ್ ಹೊಂದಿರುವ ಈ20ಯಿಂದ, ಪೆಟ್ರೋಲ್ ಬಿಣಿಗೆಗಳಲ್ಲಿ ಕಂಡುಬರುವ ನಾಕಿಂಗ್(Knocking) ಸಮಸ್ಯೆಯನ್ನು ಕಡಿತಗೊಳಿಸುತ್ತದೆ. ಇದರಿಂದ ಬಿಣಿಗೆಯ ಬಾಳಿಕೆಯು ಹೆಚ್ಚಲಿದೆ.
  3. ಸಾಮಾನ್ಯ ಪೆಟ್ರೋಲ್ ಬದಲು 80% ಪೆಟ್ರೋಲ್ ಮತ್ತು 20% ಇಥೆನಾಲ್ ಬಳಕೆಯಿಂದ, ಹೆಚ್ಚಿನ ಪೆಟ್ರೋಲ್ ಮೇಲಿನ ಅವಲಂಬನೆ ಮತ್ತು ಪೆಟ್ರೋಲ್ ಆಮದಿನ ಮೇಲೆ ಭಾರತದ ಹೊರೆ ತಪ್ಪುತ್ತದೆ. ಇದರಿಂದ ಸರಕಾರಕ್ಕೆ ಕೋಟ್ಯಾಂತರ ಹಣದ ಉಳಿತಾಯವಾಗಲಿದೆ.
  4. ಇಥೆನಾಲ್ ದೇಶದಲ್ಲೇ ತಯಾರಿಸಬಹುದು, ಇದರಿಂದ ದೇಶದೊಳಗಿನ ಇಥೆನಾಲ್ ಕೈಗಾರಿಕೆಗೆ ಹುರುಪು ತುಂಬುವುದಲ್ಲದೇ ದೇಶದ ಹಣಕಾಸಿಗೆ ಲಾಭ ತರಲಿದೆ.
  5. ದೇಶೀಯ ಕೃಷಿ ಆಧಾರಿತ ಕೈಗಾರಿಕೆಗೆ ಬೆಂಬಲ ನೀಡುವುದರಿಂದ ಹೆಚ್ಚಿನ ಕೆಲಸಗಳು ಹುಟ್ಟುಕೊಳ್ಳುವುದಲ್ಲದೇ ಹಳ್ಳಿ-ಹೋಬಳಿ ಮಟ್ಟದ ಆರ್ಥಿಕತೆಯನ್ನು ಬಲಪಡಿಸಲಿದೆ.

ಅನಾನುಕೂಲಗಳು:

  1. ಈಗ ರಸ್ತೆಯಲ್ಲಿ ಓಡಾಡುವ ಎಲ್ಲ ಪೆಟ್ರೋಲ್ ಬಂಡಿಗಳು ಈ20 ಬಳಕೆಗೆ ತಕ್ಕುದಾಗಿಲ್ಲ. 2023ಕ್ಕಿಂತಲೂ ಹಳೆಯದಾದ ಗಾಡಿಗಳು ಸಾಕಷ್ಟಿವೆ. ಆದ್ದರಿಂದ ಎಲ್ಲ ಗಾಡಿಗಳಿಗೆ ಈ20 ಉರುವಲನ್ನು ಬಳಕೆ ಮಾಡಲಾಗದು. ಹಳೆಯ ಗಾಡಿಗಳು ಈ20 ಉರುವಲಿಗೆ ತಕ್ಕ ಬಿಡಿಭಾಗಗಳನ್ನು ಪಡೆದಿಲ್ಲ. ಹಳತಾದ ಗಾಡಿಗಳಿಗೆ ಈ20 ಉರುವಲು ಬಳಸುವುದು ಸರಿಯಲ್ಲ.
  2. ತುಕ್ಕು ಹಿಡಿಯುವಿಕೆಯ ಸಮಸ್ಯೆ: ಇಥೆನಾಲ್ ತನ್ನದೇಯಾದ ರಾಸಾಯನಿಕ ಗುಣಗಳನ್ನು ಹೊಂದಿದೆ, ಇದಕ್ಕೆ ತಕ್ಕಂತ ಉರುವಿಲಿನ ಕೊಳವೆ/ಕೊಳಾಯಿ (fuel tank/pipes) ಮುಂತಾದ ಬಿಡಿಭಾಗಗಳನ್ನು ಮಾರ್ಪಡಿಸಬೇಕು. ಇಲ್ಲದೇ ಹೋದಲ್ಲಿ ಬಿಡಿಭಾಗಗಳು ಬೇಗನೇ ಹಾಳಗುವ ಸಾಧ್ಯತೆಯಿರುತ್ತದೆ.
  3. ಇಥೆನಾಲ್ ಹೆಚ್ಚು ತೇವಾಂಶ ಹೀರಿಕೊಳ್ಳುವ ಗುಣಹೊಂದಿದೆ. ಇದೇ ಕಾರಣಕೆ, ಮೇಲೆ ಹೇಳಿದಂತೆ ಇದು ತುಕ್ಕು ಹಿಡಿಯಲು ನೆರವಾಗುತ್ತದೆ. ಇದರಿಂದ ಕೇವಲ ಲೋಹದ ಬಿಡಿಭಾಗಗಳಷ್ಟೇ ಅಲ್ಲದೇ, ಪ್ಲ್ಯಾಸ್ಟಿಕ್, ರಬ್ಬರ್ ಭಾಗಗಳು ಸವೆದು, ಬಿರುಕು ಮೂಡಲಾರಂಭಿಸಿ ಹಾಳಾಗುತ್ತವೆ.
  4. ಇಥೆನಾಲ್ ತಯಾರಿಸಲು ಕಬ್ಬು, ಮೆಕ್ಕೆಜೋಳದಂತ ಬೆಳೆಗಳು ಬೇಕು. ಹೆಚ್ಚಿನ ಇಳುವರಿ ಪಡೆಯಲು ರೈತರು  ಹೆಚ್ಚಿನ ರಸಗೊಬ್ಬರ, ಕೀಟನಾಶಕಗಳನ್ನು ಬಳಸಿ ಹೊಲಗದ್ದೆಗಳಿಗೆ ಹೆಚ್ಚಿನ ಹಾನಿ ಮಾಡುವುದಲ್ಲದೇ, ವಾತಾವರಣದ ಮಾಲಿನ್ಯಕ್ಕೆ ಕಾರಣವಾಗಬಹುದು. ಇದು ಮಣ್ಣಿನ ಸವಕಳಿಯನ್ನು ಇಮ್ಮಡಿಗೊಳಿಸುವ ಅಪಾಯ ತಂದೊಡ್ಡಲಿದೆ.
  5. ಇಥೆನಾಲ್ ಬಳಕೆಗೆ ತಕ್ಕಂತ ಸೌಲಭ್ಯಗಳನ್ನು ಬೆಳವಣಿಗೆಗೊಳಿಸುವುದು ಸುಲಭವಲ್ಲ. ಇಥೆನಾಲ್ ತಯಾರಿಸಿ, ಕೂಡಿಡಲು ಕೊಳಾಯಿಗಳು, ಅದನ್ನು ಸಾಗಿಸಲು ಹಳ್ಳಿಯಿಂದ ದಿಲ್ಲಿಯವರೆಗೆ ನಳಿಕೆ/ಕೊಳವೆಗಳ ಸಂಪರ್ಕ ಜಾಲವನ್ನು ಬೆಳವಣಿಗೆ ಮಾಡಲು ಸಾವಿರಾರು ಕೋಟಿ ಹಣಬೇಕು. ಇದು ದೇಶದ ಬೊಕ್ಕಸಕ್ಕೆ ಹೊರೆಯಾಗುವುದು.
  6. ಇನ್ನೊಂದು ಪ್ರಮುಖ ಅನಾನುಕೂಲವೆಂದರೆ, ಇಥೆನಾಲ್ ಒಳ್ಳೆಯ ಕರುಗುಕ(solvent). ಇದು ಉರುವಲು ಚೀಲದಲ್ಲಿರುವ ಕಸಕಡ್ಡಿಗಳನ್ನು ಕರಗಿಸಿಕೊಂಡಿರುತ್ತದೆ. ಇದು ಮುಂದೆ ಚಿಮ್ಮುಕ(Nozzle), ಸೋಸುಕಗಳನ್ನು(Filter) ಸೇರಿ, ಅವುಗಳಿಗೆ ಅಡ್ದಿಯಾಗುತ್ತದೆ. ಇದು ಗಾಡಿಯ ಮೈಲಿಯೋಟ ಮೇಲೆ ಪರಿಣಾಮ ಬೀರುವುದಲ್ಲದೇ, ಗಾಡಿಯನ್ನು ಪದೇ ಪದೇ ನೆರವುತಾಣಗಳಿಗೆ ಕೊಂಡೊಯ್ದು ಸೋಸುಕ ಮುಂತಾದವುಗಳನ್ನು ಸ್ವಚ್ಚಗೊಳಿಸಬೇಕಾಗುತ್ತದೆ.

ನಮ್ಮದು ಈಗಾಗಲೇ ಒಂದು ಬಂಡಿಯಿದ್ದರೆ ಏನು ಮಾಡಬೇಕು? ಈ20 ಉರುವಲು ಬಳಸಬೇಕೆ ಬೇಡವೇ?

  1. ನಮ್ಮ ಗಾಡಿಯ ಜೊತೆಗೆ ನೀಡಲಾಗಿರುವ ಕೈಪಿಡಿಯನ್ನು ಓದಿ, ಯಾವ ಉರುವಲು ಬಳಸಬೇಕು ಎಂಬುದನ್ನು ತಿಳಿದುಕೊಳ್ಳಿ. ಹೆಚ್ಚಿನ ಅನುಮಾನಗಳಿದ್ದಲ್ಲಿ, ಹತ್ತಿರದ ಮಾರಾಟ ಮಳಿಗೆಗೆ ಭೇಟಿ ನೀಡಿ ಪೂರ್ತಿ ವಿವರ ಪಡೆದು ಕೊಳ್ಳಬೇಕು.
  2. ಗಾಡಿಯು ಈ20 ಉರುವಲಿಗೆ ತಕ್ಕದಾಗಿಲ್ಲವಾದರೆ, ಈ ಉರುವಲನ್ನು ಬಳಸುವುದು ಬೇಡ. ಹಲವು ಗಾಡಿ ತಯಾರಕರು ಹಳೆಯ ಗಾಡಿಗಳನ್ನು ಈ20ಗೆ ತಕ್ಕಂತೆ ಮಾರ್ಪಾಡಿಸುವ ಕೆಲಸದಲ್ಲಿದ್ದಾರೆ. ಅವರನ್ನು ಸಂಪರ್ಕಿಸಿ, ಮಾಹಿತಿ ಪಡೆದು, ಮಾರ್ಪಡಿಸಿದ ನಂತರ, ತಯಾರಕರ ಸಲಹೆಯಂತೆ ಈ20 ಉರುವಲಿನ ಬಳಕೆ ಮಾಡಬಹುದು.

ಈ20ಗೆ ಮಾರ್ಪಾಡಿಸಲು ಬಂಡಿ ತಯಾರಕರು ಬಂಡಿಯಲ್ಲಿ ಯಾವ ರೀತಿಯ ಬದಲಾವಣೆಗಳು ಇರಲಿವೆ.

  1. ಮೊದಲನೇಯದಾಗಿ ಉರುವಲನ್ನು ಹೊತ್ತೊಯ್ಯುವ ಕೊಳವೆ, ಉರುವಲು ಚೀಲ(Fuel Tank), ಚಿಮ್ಮುಕ, ಬಿಣಿಗೆಯಲ್ಲಿ ಉರುವಲು ಏರ್ಪಾಟಿನ ವಿವಿಧ ಭಾಗಗಳು ಮಾರ್ಪಡಿಸಲಾಗುತ್ತದೆ.
  2. ಉರುವಲು ಏರ್ಪಾಟಿನಲ್ಲಿ ಬಳಸಲಾಗುವ ರಬ್ಬರ್, ಪ್ಲ್ಯಾಸ್ಟಿಕ್ ಮುಂತಾದ ಸವೆದು ಹೋಗುವ ಭಾಗಗಳು ಬದಲಾಯಿಸಿ ಈ20ಗೆ ತಕ್ಕಂತೆ ಮರು ಈಡುಗಾರಿಕೆ ಮಾಡುತ್ತಾರೆ.
  3. ಬಂಡಿಯಲ್ಲಿ ಬಳಸಲಾಗುವ ಆಕ್ಸಿಜನ್ ಅರಿವಿಕ(O2 Sensor), ಉರುವಲಿನ ಅರಿವಿಕಗಳನ್ನು(Fuel Sensor) ಮರು ಈಡುಗಾರಿಕೆ ಮಾಡಿಯೋ ಇಲ್ಲವೋ ಉರುವಲಿಗೆ ತಕ್ಕಂತೆ ಮರು ತಿಡಿ/ತಿದ್ದುಪಡಿ ಮಾಡಿ, ಬಿಣಿಗೆಯ ಗಣಕದೊಂದಿಗೆ ಸರಿಹೊಂದಿಸುತ್ತಾರೆ (Calibration).
  4. ಇವೆಲ್ಲ ಮುಗಿದ ಮೇಲೆ, ಮಾರ್ಪಾಡುಗೊಂಡ ಬಿಣಿಗೆ ಮತ್ತು ಬಂಡಿಗಳನ್ನು ವಿವಿಧ ರೀತಿಯಾಗಿ ನೂರಾರು ಗಂಟೆಗಳ ಕಾಲ ಓರೆಗೆ ಹಚ್ಚಿ ಎಲ್ಲವೂ ನೆಟ್ಟಗೆ ಕೆಲಸ ಮಾಡಲಾಗುತ್ತಿದೆಯೇ ಎನ್ನುವುದನ್ನು ತಿಳಿದುಕೊಳ್ಳುತ್ತಾರೆ.

 

ಈ20 ಉರುವಲನ್ನು ಬಳಸುವ ಮುನ್ನ, ನಿಮ್ಮ ಬಂಡಿ ತಯಾರಕರು ನೀಡಿರುವ ಬಳಕೆಯ ಸಲಹೆ-ಸೂಚನೆ ಗಳನ್ನು ತಿಳಿದುಕೊಂಡು ಮುಂದುವರೆಯುವುದು ಒಳ್ಳೆಯದು.

ಕರೆಂಟ್ ಶಾಕ್ – ಏನಿದರ ಹಿನ್ನೆಲೆ?

  By , , ,

– ಹರ್ಷಿತ್ ಮಂಜುನಾಥ್.

electric shock

ನೀವೊಂದು ಗಾದೆ ಕೇಳಿರಬಹುದು.

ಬಟ್ಟೆ ಮುಳ್ಳಿನ ಮೇಲೆ ಬಿದ್ದರು, ಮುಳ್ಳೇ ಬಟ್ಟೆಯ ಮೇಲೆ ಬಿದ್ದರೂ ಹರಿಯುವುದು ಬಟ್ಟೆಯೇ!

ಈ ಗಾದೆಗೂ ಮಾನವನಿಗೂ ಮಿಂಚುಹೊಡೆತಕ್ಕೂ (Electric shock) ತುಂಬಾ ಹೊಂದಾಣಿಕೆಯಿದೆ. ಅಂದರೆ ಮನುಷ್ಯನ ಮಯ್ಯಿಗೆ ಮಿಂಚು ತಗಲಿದರೂ, ಮಿಂಚಿಗೆ ಮಯ್ಯಿ ತಗುಲಿದರೂ ಮಿಂಚುಹೊಡೆತಗಳು ಅನುಭವವಾಗುವುದು ಮನುಷ್ಯನಿಗೆ.  ಮಯ್ ತೊಗಲು, ಹುರಿಕಟ್ಟು(Muscle), ಕೂದಲು ಸೇರಿದಂತೆ ಮನುಷ್ಯನ ಅಂಗಗಳು ಮಿಂಚಿನ ಹರಿವಿಗೆ ತಗಲುವುದರಿಂದ ಮಿಂಚುಹೊಡೆತಗಳು ಏರ್ಪಡುತ್ತವೆ.

ಸಾಮಾನ್ಯವಾಗಿ ಮನುಷ್ಯನ ಗಮನಕ್ಕೆ ಬರಬಲ್ಲ ಮಿಂಚು, ಮಿಂಚಿನ ನೇರ ಹರಿವು(Direct current) ಅತವಾ ಬದಲಿ ಹರಿವು (Alternate current) ಮತ್ತು ಸಲದೆಣಿಕೆ(Frequency)ಯನ್ನು ನೆಚ್ಚಿಕೊಂಡಿರುತ್ತದೆ. ಆದರೆ ಕೆಲವೊಮ್ಮೆ ಸಣ್ಣ ಪ್ರಮಾಣದ ಮಿಂಚು ಮನುಷ್ಯನ ಗಮನಕ್ಕೆ ಬಾರದೆಯೂ ಇರಬಹುದು. ಅಷ್ಟಕ್ಕೂ ಮಯ್ಯಿಗೆ ಮಿಂಚು ತಗುಲಿದೊಡನೆ ಮಯ್ಯಿ ಮಿಂಚನ್ನು ಏಕೆ ಸೆಳೆದುಕೊಳ್ಳುತ್ತದೆ? ಮಿಂಚು ಮನುಷ್ಯನ ಮಯ್ಯ ಮೇಲೆ ಹರಿದಾಡಲು ನೆರವಾಗಬಲ್ಲ ಅಂಶಗಳೇನು? ಮತ್ತು ಮಿಂಚೊಡೆತಗಳು ಮನುಷ್ಯನ ಬದುಕಿಗೆ ಹೇಗೆ ಕುತ್ತು ತರುತ್ತವೆ? ಎಂಬುದನ್ನು ಮುಂದೆ ತಿಳಿಯೋಣ.

ಮನುಷ್ಯನ ಮಯ್ಯಿಗೆ ಮಿಂಚು ತಗಲಿದೊಡನೆ ಮಯ್ಯಿ ಮಿಂಚನ್ನು ಸೆಳೆದುಕೊಳ್ಳಲು ಮುಕ್ಯ ಕಾರಣ ರಾಸಾಯನಿಕ ಕಸುವು (Chemical energy). ಇದು ಮಯ್ಯಿಯ ಒಳಗಡೆ ಏರ್ಪಡುವ ಸೀರಕೂಟಗಳು (Atoms)  ಮತ್ತು ಅಣುಕೂಟಗಳ (Molecules) ಪ್ರತಿಕ್ರಿಯೆಯಿಂದ (Reactions) ಏರ್ಪಡುತ್ತದೆ.

  • ನಾವು ಸೇವಿಸುವ ಕೆಲವು ಆಹಾರ ಹೊಟ್ಟೆಯೊಳಗೆ ಕರಗುವ ಹೊತ್ತಿನಲ್ಲಿ ಆಹಾರಗಳಲ್ಲಿರುವ ಅಣುಕೂಟಗಳು ಚಿಕ್ಕ ಚಿಕ್ಕ ಅಣುಕೂಟಗಳಾಗಿ ಬೇರ್ಪಡುತ್ತವೆ. ಈ ಅಣುಕೂಟಗಳು ಮನುಷ್ಯನ  ಮಯ್ಯೊಳಗೆ ಉಸಿರುಗಾಳಿ(O2-Oxygen), ಸೋಡಿಯಂ (Na-Sodium), ಪೊಟ್ಯಾಶಿಯಂ  (K-Potassium), ಮತ್ತು ಬೇರುಸುಣ್ಣ(Ca-Calcium) ನಂತಹ ಬೇರಡಕಗಳನ್ನು (Elements) ಕಟ್ಟಿಕೊಡುತ್ತದೆ.
  • ಅಲ್ಲದೇ ಇವೆಲ್ಲಕ್ಕೂ ಅದರದ್ದೇ ಆದ ಮಿಂಚಿನ ಹುರುಪು (Electrical charge) ಇರುತ್ತದೆ. ಅಂದರೆ ಇವುಗಳಲ್ಲಿ ಗೊತ್ತುಮಾಡಿದ ಎಣಿಕೆಯ ಕೊಡುವಣಿಗಳು (Protons), ನೆಲೆವಣಿಗಳು (Neutrons) ಮತ್ತು ಕಳೆವಣಿಗಳು (Electrons) ಇರುತ್ತವೆ. ಇಂತಹ ಮಿಂಚಿನ ಹುರುಪುಗಳು ಕೂಡು-ಹುರುಪು (Positive charge) ಆಗಿರಲೂಬಹುದು ಅತವಾ ಕಳೆ-ಹುರುಪು(Negative charge) ಆಗಿರಲೂಬಹುದು, ಒಟ್ಟಿನಲ್ಲಿ ಇವು ಅಣುಕೂಟಗಳೊಂದಿಗೆ ಪ್ರತಿಕ್ರಿಯಿಸುತ್ತದೆ.
  • ಇಂತಹ ಕ್ರಿಯೆಯನ್ನು ಅಣು ಕೂಡಿಕೆ (Nuclear fusion) ಎನ್ನುವರು, ಮತ್ತು ಈ ಪ್ರಕ್ರಿಯೆಗಳು ಮಿಂಚು ಹರಿಯಲು ಬೇಕಾದ ಕಸುವನ್ನು ಹುಟ್ಟುಹಾಕುತ್ತದೆ.

ಹೀಗೆ ಮಿಂಚು ಮಯ್ಯ ಒಳಗಡೆಗೆ ಹರಿಯಲು ಬೇಕಾದ ಅಂಶಗಳು ಮಯ್ಯಲ್ಲಿರುವುದರಿಂದ ಮಿಂಚು ಮಯ್ಯೊಳಗೆ ಹರಿದು ಮಿಂಚೊಡೆತದ ಅರಿವು ನಮಗಾಗುತ್ತದೆ. ಇಂತಹ ಮಿಂಚುಹೊಡೆತಗಳು ಸಾವು ತರಲೂಬಹುದು. ಹೀಗೆ ಮಿಂಚಿನಿಂದಾಗುವ ಸಾವನ್ನು ಮಿಂಮಡಿತ (Electrocution) ಎನ್ನುವರು. ಆದರೆ ನಿಮಗೆ ತಿಳಿದಿರಲಿ, ಹೆಚ್ಚಿನ ಮಿಂಚೊಡೆತದ ಸಾವುಗಳು ಮಿಂಚಿನ ಬದಲಿ ಹರಿವಿನಿಂದ ಆಗುತ್ತದೆ. ಮತ್ತು ಹೆಚ್ಚಾಗಿ 500 ವೋಲ್ಟ್ ಗಿಂತಲೂ ಕಡಿಮೆ ಹರಿವಿನಿಂದ ಆಗುತ್ತದೆ. ಅಂದ ಮಾತ್ರಕ್ಕೆ ಹೆಚ್ಚು ವೋಲ್ಟ್ ಇರುವ ಮಿಂಚೊಡೆತ ಅಪಾಯಕಾರಿಯಲ್ಲ ಎಂದಲ್ಲ. ಇಲ್ಲಿ ಮನುಷ್ಯನ ಮಯ್ಯಲ್ಲಿರುವ ತಡೆತ(Resistance) ಹೆಚ್ಚಿನ ಪಾತ್ರವಹಿಸುತ್ತದೆ.

ಅಂದರೆ ಮಯ್ಯ ಒಣಬಾಗಕ್ಕೆ ಮಿಂಚು ತಗುಲಿದರೆ ಮಯ್ಯೊಳಗೆ ಹರಿಯಬಲ್ಲ ಮಿಂಚಿನ ಸಾಧ್ಯತೆಗಿಂತ, ತಂಪಿನ ಭಾಗಕ್ಕೆ ಮಿಂಚು ತಗುಲಿದರೆ ಮಿಂಚೊಡೆತ ಆಗುವ ಸಾಧ್ಯತೆ ಹೆಚ್ಚಿರುತ್ತದೆ. ಕಾರಣ ಒಣಭಾಗಕ್ಕೆ ಹೆಚ್ಚಿನ ತಡೆತವಿರುತ್ತದೆ. ಹಾಗಾಗಿ ಇದು ಅಷ್ಟು  ಬೇಗನೆ ಮಿಂಚನ್ನು ತನ್ನೊಳಗೆ ಬಿಟ್ಟುಕೊಳ್ಳುವುದಿಲ್ಲ. ಆದರೆ ತಂಪಿರುವ ಭಾಗಕ್ಕೆ ತಡೆತ ಕಡಿಮೆ ಇರುವುದರಿಂದ ಬೇಗನೆ ಮಿಂಚು ಮಯ್ಯೊಳಗೆ ಹರಿಯುತ್ತದೆ. ಮಿಂಚು ಮನುಷ್ಯನ ಮಯ್ಯ ಯಾವುದೇ ಬಾಗಕ್ಕೆ ತಾಕಿದರೂ ಆ ಭಾಗವನ್ನು ಹಾನಿಗೊಳಿಸುತ್ತದೆ. ಹಾಗಾಗಿ ಮಿಂಚೊಡೆತದಿಂದ ಗಾಯಗಳಾಗುವುದು ಸಹಜ.

ಆದರೆ ಇಲ್ಲಿ ನಾವು ಕೆಲವು ವಿಷಯಗಳನ್ನು ಗಮನಿಸಬೇಕು.

  • ಮಿಂಚೊಡೆತ ನಡೆದಾಗ ಎಷ್ಟು ಆಂಪ್ (Amp) ಮಿಂಚು ಒಳಹರಿವಾಗಿದೆ.
  • ಮಯ್ಯಲ್ಲಿ ಮಿಂಚು ಹರಿದಾಡುವ ದಾರಿ
  • ಮಯ್ಯಿ ಮಿಂಚಿಗೆ ಸೋಕಿರುವ ಒಟ್ಟು ಹೊತ್ತು.

ಮಿಂಚೊಡೆತದಿಂದ ಮಯ್ಯಲ್ಲಿ ಆಗಬಹುದಾದ ಅರಿದಾದ (important) ತೊಂದರೆಗಳೆಂದರೆ,
i. ಮಯ್ ಸುಡುವಿಕೆ (burns): ಮಿಂಚಿನ ಹರಿವಿಗೆ  ಮಯ್ ಒಡ್ಡುವ ತಡೆತದಿಂದಾಗಿ (resistance) ಹೊಮ್ಮುವ ಬಿಸುಪು (heat) ಗೂಡುಕಟ್ಟುಗಳನ್ನು (tissues) ಸುಡುತ್ತದೆ.
ii. ಗುಂಡಿಗೆಯ ತೊರೆಗೋಣೆಗಳಏರ್ಪಡಿತವನ್ನು ಉಂಟುಮಾಡುತ್ತದೆ (ventricular fibrillation).
iii. ಮಿಂಚು ತನ್ನ ಹರಿವಿನ ಹಾದಿಯಲ್ಲಿ ಬರುವು ನರಗಳಿಗೂ ಹಾನಿಯನ್ನುಂಟು ಮಾಡುವ ಅಳವನ್ನು ಹೊಂದಿದೆ.

ಮಿಂಚೊಡೆತದಿಂದ ಮಯ್ಯಲ್ಲಿ ಉಂಟಾಗುವ ಏರು-ಪೇರುಗಳು ಮನುಷ್ಯರನ್ನು ಸಾವಿನ ದವಡಿಗೂ ನೂಕಬಹುದು. ಹೀಗೆ ಮಿಂಚೊಡೆತದಿಂದ  ಆಗುವು ಸಾವನ್ನು ‘ಎಲೆಕ್ಟ್ರಿಕ್ಯೂಶನ್’ ಎಂದು ಹೇಳಲಾಗುತ್ತದೆ. ಕನ್ನಡದಲ್ಲಿ ಇದನ್ನು ‘ಮಿಂಮಡಿತ’ ಎಂದು ಹೇಳಬಹುದು. ‘ಎಲೆಕ್ಟ್ರಿಕ್ಯೂಶನ್’ ಪದವನ್ನು 1890 ರಲ್ಲಿ ಮೊದಲಸಲ ಬಳಸಲಾಯಿತು. ಆ ಹೊತ್ತಿನಲ್ಲಿ ಮಿಂಚನ್ನು ಬಳಸಿ ಕೈದಿಗಳನ್ನು ಕೊಲ್ಲುತ್ತಿದ್ದ ಬಗೆಯನ್ನಷ್ಟೇ ‘ಎಲೆಕ್ಟ್ರಿಕ್ಯೂಶನ್’ ಎಂದು ಕರೆಯುತ್ತಿದ್ದರು. ಮುಂದೆ ಮಿಂಚಿನ ಕೆಟ್ಟಾಗುಹಗಳಿಂದ (accident) ಉಂಟಾಗುವ ಸಾವುಗಳಿಗೂ ‘ಎಲೆಕ್ಟ್ರಿಕ್ಯೂಶನ್’ ಪದವನ್ನು ಬಳಸಲಾರಂಬಿಸಿದರು.

(ತಿಟ್ಟಸೆಲೆ: dawsonpower.com)